चांद्रयान मोहीम आनीक १५० वरांनी सोंपतली : आतां कितें जातलें?

भांगरभूंय | प्रतिनिधी

इस्रोच्या यानान चंद्राचेर पावल दवरलें तेन्ना सगल्या भारतीयांक अभिमान दिसलो. चांद्रयान-३ चंद्राचे दक्षिणेक २३ ऑगस्टाक देंवलें आनी तेन्ना सावन ताणें जायती म्हत्वाची म्हायती जमयल्या. पूण आतां चांद्रयान-३ चे प्रज्ञा रोव्हर आनी विक्रम लँडर १४ दिसांच्या मिशनाच्या शेवटाक पावल्यात. फकत ६ दीस उरल्यात. चांद्रयान- ३ आपल्या निमाण्या ६ दिसांत जायते व्हडले चमत्कार करूंक शकता, जे संवसाराक उपेगी पडटले. चंद्रयान-३ चंद्राचेर कितें करतलें तें समजून घेवया.
इस्रोन १४ जुलयाक हें मिशन सुरू केलें. चंद्राच्या दक्षीण ध्रुवाचेर पावपी भारत संवसारांतलो पयलो देश थारला. विक्रम लँडर आनी प्रज्ञा रोव्हराचें आयुश्य फकत १४ दीस आशिल्लें, जें एक चंद्राच्या दिसा इतलें आसता. चंद्राचेर सुर्याचो अस्त जातकच दोगांयचें काम बंद जातलें. म्हणल्यार विक्रम-प्रज्ञान हांचे कडेन सुमार १५० वरां उरल्यांत.
चांद्रयान-३ न आतां मेरेन ऑक्सिजन, तापमानांत बदल, चंद्राचे दक्षिणेकडलीं फोंडकुलां आनी हेर घटक सोदून काडल्यात. आतां फुडल्या दिसांनी चंद्राचेर भुंयकांपाची क्रिया, चंद्र आनी धर्तर हांचे मदले संकेत आनी मातयेंत मेळपी कण हांचे मदलें अंतर हांचो अभ्यास जातलो.
इस्रोच्या पंगडान हें मिशन सुरू केलें तेन्ना ताचें आयुश्य १४ दिसांचें अशें कळ्ळें. चंद्राच्या दक्षीण ध्रुवाक काळो वाठार अशेंय म्हणटात, कारण तो सुर्याच्या संपर्कांत सरळ येना आनी चड काळ काळो आसता. पूण चंद्राचो एक दीस म्हळ्यार धर्तरे प्रमाण १४ दीस. सध्या सुर्याचीं किरणां हांगा पावतात, ताच्या आदारान विक्रम लँडर आनी प्रज्ञा रोव्हर वावुरतात. चंद्रूय घुंवता, देखून ताचेर १४ राती आनी १४ दीस आसतात. ताचोय चंद्रयान-३ चेर परिणाम जावपाक लागला.
पूण ह्या काळांतूय चांद्रयान-३ न जें येस मेळयलां तें संवसारांतल्या खंयच्याच देशाक करपाक जमूंक ना. विक्रम लँडराचेर बसयल्ल्या कांय यंत्रां वरवीं चंद्राचेर ड्रिलींग केलें. ताका लागून चंद्राचेर आशिल्ल्या तापमानांत फरक कळून आयलो. चंद्राच्या पृष्ठभागाच्या ८ सेंटी मिटर सकयल आशिल्लें तापमान – १० अंशां वयर वता. तशेंच, विक्रम लँडराच्या LIBS पेलोडांत चंद्राच्या पृष्ठभागाचेर ऑक्सिजना सयत वट्ट ८ घटक आशिल्ल्याचें कळ्ळें. हांगा हायड्रोजन मेळ्ळ्यार उदकाची शक्यताय वाडटली.