भांगरभूंय | प्रतिनिधी
घुडीपाडवो म्हणलें की, येता… घुडी पूजन, रांगोली, भारतीय मुस्तायकी, गोड जिनस, भगवे बावटे आनी सगळ्यांत म्हत्वाचें म्हणल्यार नव्या वर्साचीं परबीं! खंयचोय सण ही मौज-मजेची गजाल न्हय, पूण तो मांगल्य, पावित्र्य आनी चैतन्याचो आनंदसुवाळो. तसोच घुडीपाडवो!
हिंदू धर्मांत साडेतीन म्हूर्तांचेर शुभ काम करपाचो संकल्प करतात. घुडीपाडवो हो तातूंतलो एक म्हूर्त.
नवी वस्तू विकत घेवप वा वेवसाय सुरू करप अशीं शुभ कामां ह्या दिसा हिंदू करतात. हो दीस शुभ आशिल्ल्यान आमी देवा मुखार प्रार्थना करतात. आमचें बरें जावं अशें मागणें करतात. जिणेंत आमी कितें साध्य करपाक सोदतात, ताचें प्रतीक म्हळ्यार घुडी. घुडीपाडवो चैत्र म्हयन्याच्या पयल्या दिसा पडटा देखून त्या दिसाक ‘प्रतिपदा’ अशें म्हण्टात. दरेक पावल प्रभावीपणान मुखार व्हरपाक दरेक खीण मोलादीक आसा. ताचें मोल समजपाक दरेक खिणाक संद मेळटा. ‘तें जाणून जियेवंक जाय’ अशें प्रतिपदा सांगता. गुडी पाडव्याच्या दिसा आमकां मेळपी संद वापरूंया.
ध्येयाचे दिकेन वतना दर खिणाक ते दिकेन पावल दवरप, म्हणल्यार प्रतिपदा! मरण केन्ना येतलें तें सांगूंक जायना. प्रतिपदा म्हळ्यार दर खिणाक सादूरपणान आपल्या ध्येया कडेन वचप. प्रतिपदा म्हळ्यार दर खिणाक जागृत रावप. कोडू लिंबू जरी कडू आसलो तरी ताचो फायदो जाता. सत्यूय कोडू आसता. हे खातीर कोडू लिंबाचीं पानां घुडयेचेर लायतात. हो ते वनस्पतीचो सत्कार. तिचो भोवमान करपाक ह्या उत्सवांत तिका म्हत्व दितात. घुडयेचेर उमथो दवरिल्लो कलश (तांब्याचो तांबयो), म्हळ्यार कळस वा शिखर. तें साध्य करप म्हणल्यार येसस्वी जावप. घुडीपाडवो हो फकत उत्सव न्हय तर प्रगतींत चलपाक शिकोवपी गुरू.
चैताली अणवेकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
