भांगरभूंय | प्रतिनिधी
50 लाखांचीं घुंवळे वखदां जप्त
पणजी: गोंय पुलिसांच्या घुंवळे वखदां विरोधी पंगडान आयतारा फांतोडेर आसगांवां धाड घालून नामनेचो इटालियन डीजे मायकल लॉरेन्स स्टेफेनोनी उर्फ डीजे बबलहेड (32) आनी नेल वॉल्टर (28) हांकां अटक केली. दुबावितां कडल्यान 50.25 लाख रुपया मोलाचें 50 ग्राम आयएसडी आनी 50 ग्राम ड्रग्स जप्त केलो.
घुंवळे वखदां विरोधी पंगडान (एएनसी) दिल्ले म्हायती प्रमाण आसगांवां रावपी डीजे मायकल लॉरेन्स स्टेफेनोनी हाचो घुंवळे वखदां तस्करीत वांटो आशिल्ल्याची म्हायती गुप्तहेरांनी पंगडाक दिल्ली.
ते प्रमाण पुलीस अधिक्षक बॉसेट सिल्वा आनी उपअधिक्षक नेर्लोन आल्बुकर्क हांच्या मार्गदर्शना खाला पुलीस निरिक्षक संजीत पिल्ले हांच्या फुडारपणा खाला पंगडान आसगांवां संबंदीत घराचेर धाड घालून नामनेचो इटालियन डीजे मायकल लॉरेन्स स्टेफेनोनी उर्फ डीजे बबलहेड आनी नेल वॉल्टर ह्या दोगांक ताब्यांत घेतले.
उपरांत तांची झडटी घेतली तेन्ना तांचे कडल्यान 50.25 लाख रुपया मोलाचें 50 ग्राम एलएसडी आनी 50 ग्राम ड्रग्स जप्त केलो. तांकां घुंवळे वखदां विरोधी कायद्याच्या 20 (बी)(ii)(बी) आनी 29
कलमा खाला गुन्यांव दाखल करून अटक केली.
अटक केल्ल्या दुबावितांक पुलीस कोठये खातीर म्हापशेंच्या पयलो वर्ग न्यायालयांत हजर करतकूच न्यायालयान त्या दोगांकूय 10 दीस पुलीस कोठी दिली.
नामनेचो इटालियन डीजे मायकल लॉरेन्स स्टेफेनोनी उर्फ डीजे बबलहेड हणजूणें-वागातोर वाठारांतले एका नायट क्लबांत डीजे म्हूण काम करता. 2 वेर हणजूण्यां जाल्यार 3 वेर वागातोर वाठारांत क्लबांनी आयोजीत केल्ल्या पार्ट्यांनी डीजे म्हूण संगीत वाजयतालो. ह्या पार्ट्यां खातीर ताणें वयलें ड्रग्स हाडिल्ल्याचो एएनसीचो मुळावो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
