भांगरभूंय | प्रतिनिधी
नवे व्हंकलेक संवसार पाडव्याक सांजवेळार पासडी रिती प्रमाण पांचवी काठाची साडी न्हेसयतात. ती साडी तिचे आवयन हाडपाची अशी प्रथा आसा. घोव आपले मोगाचे बायलेक तरातराच्या भांगरा वस्तींनी सजयता.
धोल- ताशे, रोमटां मेळ, तरातरांचें चित्ररथ, तालगडी, गोफ, होळी, गुलाल, विवीध रिती, परंपरा…. हातांत हात घालून मौज- मजा करपाचो शिगमो केन्ना सोंपलो आनी संवसार पाडव्याचें आगमान केन्ना जालें तें कळ्ळेंच ना. काल कांय कडेन विरभद्र, गुलाल मनयलो.
आयज ९ एप्रीलाक संवसार पाडवो. हिंदुंचें नवें वर्स. साडेतीन म्हुर्तां मदलो एक. घराची नितळसाण करून दाराच्या दोनूय वटेन सोबीत रांगोळी काडटात. ‘शुभ लाभ’ हीं अक्षरां रांगोळीन सजयतात. दाराक रोजां, आंब्याच्या पानांचें तोरण बांदपाची परंपरा आसा. देवघरांत देवाची भक्तीभावान पुजा करतात. धुप, कापूर, उजवातीचो परमळ घरांत पातळटा. रांदचे कुडींतल्यान पंचपक्वान्नांचो खमंग वास येतकच भूक चाळवता. संवसार पाडव्याक मंगलमय वातावरण उंचायेर व्हरता. ह्या दिसा बऱ्या कामाची सुरवात केल्यार तें काम रोखडेंच पूर्ण जाता, अशें म्हणटात. पाडव्याचो सण चैत्रांत येता. सैम सामको नटिल्लो आसता. झाडाच्या तोंकाक नाविन्याचो स्पर्श जाल्लो आसता. म्हणल्यार नवीं कंवळीं आंकरी. मोव पानां. ह्या दिसांनी दीसभर उश्णताय आसता. सांजवेळा मात्शें थंड दिसता. वातावरणांत एक उमेद आसता.
चैत्र पाडव्याक घराचे फुडले वटेन तुळशी कडेन वा बाल्कनींत बांबू दवरतात. ताका रोजांची माळ, आंब्याचो ताळो, वयर उमथो तांब्याचो कलश आनी केसरी रंगाचें वस्त्र बांदून तो बांबू अर्थांत घुडी जमनींत पुरून उबी करतात. बाल्कनींत दवरल्यात ती दोरयेन बांदून उबी करतात. मागीर तिका हळद- कुकूम लावन तिची पुजा करतात. घुडी उबारपक म्हणल्यार सुख, शांती आनी समृद्धीचें प्रतिक. ती उबारून नव्या वर्साची मंगलमय सुरवात करप. 30- 35 वर्सां पयलीं थारावीक घरांनी घुडी उबारताले. मात आतां प्रत्येक हिंदू ती उबारता. फांतोडेर दादले धोतर- बंडी न्हेसून, बायलो णववारी साडी नेसून भव्य मिरवणुको काडटात. श्रीरामाचो जयघोष करतात. फांतोडेर ही मिरवणूक वातावरणांत एक वेगळेंच तरेची उमेद भरता.
नवे व्हंकलेक संवसार पाडव्याक सांजवेळार पासडी रिती प्रमाण पांचवी काठाची साडी न्हेसयतात. ती साडी तिचे आवयन हाडपाची अशी प्रथा आसा. घोव आपले मोगाचे बायलेक तरातराच्या भांगरा वस्तींनी सजयता. माथ्यार तरेकवार फुलां, भांगराचीं फुलां माळटात. चार सवायशिणी तिची खणा, नाल्लान ओट भरतात. घरा आयिल्ल्या सवायशिणींचो मानपान करतात.
खरेंच संवसार पाडवो म्हणल्यार नव्या संवसाराची भांगररुपी वाटचाल. सगल्यांक मोलादीक खीण म्हणल्यार घुडी उबारप. म्हणटकच घरांत सुख, समाधान व्हांवतलें हाची शंबर टक्के खात्री. सगल्यांक संवसार पाडव्याचीं परबीं.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
