भांगरभूंय | प्रतिनिधी
प्रतिनिधी:पणजी : स्वयंचलीत रेन गेजीक लागून रायपायण पणजे सयत दाबोळी, पेडणें, वाळपय, सांखळे, सांगें, केपें, काणकोणा ह्या वाठारांतल्या पावसाची म्हायती गोंयकारांक मेळटा. आतां म्हादय, बोंडला, मोलें, नेत्रावळी, खोतीगांव ह्या अभयारण्यांतलो पावस तशेंच तापमान, हवेचो दाब आनी वार्याची दिशा हाचीय म्हायती मेळटली.
अभयारण्यांत स्वयंचलीत हवामान यंत्रणां बसोवपी गोंय हें पयलें रज्य जावन आसा, अशें राना खात्याचे मंत्री विश्वजीत राणे हांणी सांगलें. रानां खात्यान हवामान खात्याच्या जोड पालवान म्हादय, बोंडला, मोलें, नेत्रावळी, खोतीगांव ह्या अभयारण्यांनी स्वयंचलीत हवामान यंत्रणां बसयल्यां. स्वयंचलीत हवामान मेजमाप करपी यंत्रणेचें उक्तावण रानां खात्याचे मंत्री विश्वजीत राणे हांचे हस्तुकीं जालें. ह्या वेळार मुखेल वनपाल राजीव कुमार गुप्ता, राना जीव वॉर्डन उमाकांत आनी रानां खात्याचे हेर अधिकारी हाजीर आशिल्ले. पावस, तापमान, आर्द्रता, वार्याची गती हाची दरेकी 15 मिण्टांनी म्हायती मेळटली. हाचो अभयारण्यातले हवामान कळपाक तशेंच पर्यावरण वैज्ञानिकांक लाव जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
