भांगरभूंय | प्रतिनिधी
नवी दिल्ली : हालींच हांगा अॅमेझॉनाच्या वरिश्ठ वेवस्थापकाक फारपेट करून जिवेशीं मारलो. ह्या प्रकरणांत पुलिसांनी दोग जाणांक अटक केल्या. हातूंत एक फक्त १८ वर्सांचो भुरगो आसा. ताचें नांव समीर उर्फ माया. होच तवनास पोर ही माया गॅंग चलयता.
ताच्या इंस्टाग्राम प्रोफायलाचेर नांव- बदनाम, पत्तो- कबरस्तान, उमर- जीने की, शौक – मरने का अशें बरयलां. इंस्टाग्रामाचेर ताचे 2092 फॉलोअर्स आसात. शूट आवट एट लोखंडवाला ह्या सिनेमाचो ताचेर प्रभाव पडला. ह्या पात्रा वयल्यान ताणें स्वताक माया अशें नांव दवरलां.
ईशान्य दिल्लींत नवी टोळी
पुलिसांच्या म्हणण्या प्रमाण, ईशान्य दिल्लींत चेनू, नासिर, हाशिम बाबा सारके गँग आसात, आतां नवी टोळी आयल्या. तिचें नांव माया गँग. समीर हाणें आपल्या इंस्टाग्राम प्रोफायलाचेर पिस्तूल घेवन जायते फोटो घाल्यांत. अॅमेझॉनाचो वेवस्थापक हरप्रीत गिल आनी ताचो काका गोविंद दोगांयक फारपेटांत गुळी लागली. ह्या प्रकरणांत समीर उर्फ मायाक पुलिसांनी अटक केल्या. ह्या प्रकरणांत तो मुखेल आरोपी. ह्या प्रकरणांतलो आनीक एक आरोपी म्हळ्यार आयतारा 18 वर्सां पुराय जाल्लो बिलाल गनी. फाटल्या वर्साय गणी खून आनी लुटमार प्रकरणांत आशिल्लो अशें पुलिसांनी सांगलें. त्या वेळार ताका बालसुदार केंद्रांत धाडिल्लो. पूण किशोर सुधारगृहांतल्यान भायर सरले उपरांत तो वेल्डिंगाच्या दुकानांत काम करतालो. आतां खंडणी, मारामारी, खून करता. माया गँगांत 10-12 पोराटे आसात.
अॅमेझोनाच्या मॅनेजराची हत्या
पुलिसांनी दिल्ले म्हायती प्रमाण, मंगळारा रातीं 10.30 वरांचे सुमाराक हरप्रीत आनी गोविंद सायकली वयल्यान वताले. त्या वेळार माया, गनी, सोहेल, मोहम्मद जुनैद आनी अदनान हे सगळे एका रस्त्यार दोन स्कुटरीं वयल्यान वताले. त्या वेळार हरप्रीत आनी हे सगळे एकाच सुवातेर आयले. मुखार वचपाक कोण वाट दितलो हाचेर वाद सुरू जालो. मागीर झगडीं जालीं. उपरांत मायान हरप्रीत आनी गोविंद सिंग ह्या दोगांचेर फारपेट केलो. सीसीटीव्ही फुटेज तपासले उपरांत पुलिसांक ही घडणूक कळ्ळी. तेन्ना समीर आनी ताच्या वांगड्याक अटक जाली. ह्या प्रकरणांत गोविंद हॉस्पिटलांत उपचार घेता. अॅमेझॉनाचो वेवस्थापक हरप्रीत हाका मात थंयच मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
