भांगरभूंय | प्रतिनिधी
भांगरभूंय । प्रतिनिधी
वास्कोः सौर उर्जेचो वापर करपी गोंयांतली पयली पंचायत जावपाचो मान बोगमळो- चिकोळणे पंचायत मंडळाक फावो जाला. पंचायत मंत्री आनी थळावो आमदार माविन गुदिन्हो हांचे हस्तुकीं पंचायतीच्या एमआरएप सुविधेच्या सौर उर्जा पाख्यांचें शेनवार गोंय क्रांती दिसा उक्तावण जालें. ह्या वेळार दक्षीण गोंय जिल्हो पंचायत वांगडी सुनिता थोरात. सरपंच लॉरेना डिकुन्ना हाजीर आशिल्ली.
गोंयच्या हेर पंचायत मंडळानी सौर उर्जेचो वापर करपा खातीर फुडाकार घेवपाक जाय. एमआरएप सुविधे खातीर सौर विजेचो वापर करपा खातीर पंचायत मंडळान घेतिल्ल्या फुडाकारा खातीर तांका परबीं फावो जातात. हेर पंचायतींनी सौर उर्जेचो वापर करचो आनी वीज बाकी उरल्यार ती पॉवर ग्रीडाक विकून महसूल एकठांय करचो अशें गुदिन्हो हांणी सांगलें.
एमआरएफ सुविधेंत तयार केल्लें सेंद्रीय सारें पंचायत वाठारांतल्या लोकांक फळझाडां खातीर फुकट दिवपाची येवजण बोगमळो पंचायतीक सुरू केल्या. ही बरी कल्पना आसा. नितळसाणे वांगडा पंचायत वाठार नितळ दवोरपाक ती उपेगी पडटली. दरेकल्याक कोयर नाका. मात पंचायत वाठारांत आपल्या शेजाराक एमआरएफ सुविता तयार केल्ली कोणाक नाका. लोकांक त्रास जायना अशे सुवातेर एमआरएफ सुविधा तयार करपाची पंचायत मंडळाचो यत्न आसात. मात अशी सुवात मेळप कुस्तार आसा हें लोकांनी मतींत घेवपाक जाय आनी ताका विरोध करपाक जायना अशें गुदिन्हो हांणी सांगलें.
पंचायत वाठारांतल्या कोयराचो विलो लावपा खातीर मुख्यमंत्री डॉ प्रमोद सावंत हाचें कडेन उलोवणी करून आपणे एक येवजण तयार केल्या. नवी पंचायत मंडळा स्थापन जाल्या उपरांत स म्हयन्यांत ही येवजण लागू करतले अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
