भांगरभूंय | प्रतिनिधी
खबरां संस्था
नवी दिल्लीः न्यायवेवस्थेंत पारदर्शकता हाडपाक न्यायपालिकेन म्हत्वाचें पावल उखल्लां. 27 सप्टेंबराच्यान सर्वोच्च न्यायालयांतल्या म्हत्वाच्या घटनापिठां मुखार जावपी सुनावण्यांचें थेट प्रक्षेपण करतले. 20 सप्टेंबर दिसा सर्वोच्च न्यायालयान हे विशींचो निर्णय घेतला. ताका लागून हाचे मुखार म्हत्वाच्या खटल्यांची सुनावणी देशभरांतल्या नागरिकांक पळोवपाक मेळटली.
सर्वोच्च न्यायालयांतल्या सुनावणींचें थेट प्रक्षेपण करचे, हे विशीं याचिका दाखल केले उपरांत सुमार चार वर्सांनी हो निर्णय घेतला. ह्या निर्णयाक जायत्या जाणांनी येवकार दिला, कांय जाणांनी हुस्कोय उक्तायला.
26 ऑगस्टाक भारताचे आदले सरन्यायाधीश एन. व्ही रमणा हांच्या निवृत्तीच्या दिसा सर्वोच्च न्यायालयान आपल्या सुनावण्यांचें थेट प्रक्षेपण केल्लें. मात न्यायवेवस्थेंत पारदर्शकता हाडपा खातीरचो पयलो निर्णय 2018त घेतिल्लो.
तेन्नाचे सरन्यायाधीश दीपक मिश्रा, न्यायमूर्ती ए. एम. खानविलकार आनी न्यायमूर्ती डी. वाय. चंद्रचूड हांचो आस्पाव आशिल्ल्या तीन न्यायाधिशांच्या खंडपिठान घटनात्मक आनी राष्ट्रीय हिताच्या खटल्यां वयल्या न्यायालयीन कामकाजाचें थेट प्रसारण करपाची मागणी करपी जनहीत याचिकांचेर सुनावणी करपाक सहमती दाखयिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
