भांगरभूंय | प्रतिनिधी
रोटरी क्लब ऑफ पर्वरीच्या ‘रेन रन’ हातूंत धांवपाक सेनादलाचे धांवपी उमेदीन आसात. ह्या उपक्रमाचो वांटो जावप ही आमचे खातीर अभिमानाची गजाल आसा अशें मत लश्कराच्या गोंयांतल्या 2 एसटीसीचे कर्नल पंकज नारायण हांणी उक्तायलें.
31 जुलयाक जावपी धांवपाचे सर्तींत देश विदेशांतल्यान मेळून हजारभर धांवपी आसतले, तशेंच लश्कर आनी नौदलाचे मेळून चारशे परस चड वांटेकार जातले.
देशाच्या 75व्या स्वांतत्र्यदिसाचें निमित्त सादून लश्कर, नौदल हाणें सर्तीच्या आयोजनांत रोटरी क्लब ऑफ पर्वरीक सहकार्य केलां. गोंय पर्यटन आनी बीएनआय-गोंय विभाग हांचे लेगीत पुरस्कर्ते ह्या नात्यान तेंको लाबला.
भारतीय धांवपी, तशेंच बांगलादेशांतले कांय धावपी हे सर्तींत धांवतले अशी म्हायती रोटरी रेन रनाचे अध्यक्ष अविनाश परमार हांणी दिली.
अनुक्रमान 2 किलोमीटर, 5 किलोमीटर, 10 किलोमीटर आनी 21 किलोमीटर अंतराचे सर्तींत 31 वेर बांबोळेच्या अॅथलेटिक्स स्टेडियमाचेर सुरवात जातली. ह्या उपक्रमा वरवीं बायलांची भलायकी आनी शिक्षण ह्या कामा खातीर काम करपी ‘प्रकाश कॅन्सर एड प्रॉजेक्ट’ खातीर निधी उबारतले.
मुंबयचो ब्लेड रनर प्रदीप कुंभार आनी कॅन्सरांतल्यान बरी जावपी पणजेची मारियोला मथायस हे खेपेचे सर्तींत सदिच्छा दूत आसतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
