म्हापश्यां राखणे वणत कोसळ्ळी मोटारीचेर

भांगरभूंय | प्रतिनिधी

बायल वीज कर्मचारी गंभीर जखमी; गोमॅकाँत उपचार सुरू

म्हापशें: दत्तवाडी म्हापश्यां सेंट ब्रिटो हायस्कुलाची राखणे वणत मोटारीचेर कोसळ्ळी. ह्या अपघातांत अर्चना नायक ही वीज खात्याची डेटा ऑपरेटर कर्मचारी गंभीर जखमी जाली. तिचेर गोमॅकाँत उपचार सुरू आसात.

ही घडणूक काल (सोमारा) दनपारां 1.15 वरांच्या सुमाराक दत्तवाडी काजरेश्वर देवळा कडेन घडली. सज्जन संकूल इमारतींत वीज खात्याची कचेरी आसा. दनपाराची सुटी जाले उपरांत अर्चना नायक ही बायल कर्मचारी सदचे प्रमाण जेवणा खातीर आपल्या धुळेर हांगा सोयऱ्यां कडेन वताली.

तांणी सदचे प्रमाण इमारतीच्या दवेश दारा शेजारा आपली जीए 08 ई 5076 क्रमांकाची मोटार पार्क केल्ली. जेवणाक वचपा खातीर अर्चना नायक मोटारींत बसली आनी मोटार सुरू करचे पयलींच कुशीच्या विद्यालयाची राखणे वणत मोटारीचेर कोसळ्ळी. फांतोडेर सावन पडपी उटंगाराच्या पावसाक लागून ही वणत जीर्ण जाल्ली.

मोटारीचेर राखणे वणत कोसळिल्ल्याचें नदरेक आयले उपरांत तुळशीदास खेडेकार आनी बोवाळ केलो आनी घडणूक थळाव धांव घेतली. तशेंच आशिकुशीच्या लोकांनी थंय धांव घेतली. खेडेकार हांची सज्जन संकूल इमारतींत कचेरी आसा. तांणी हेरांच्या आदारान राखणे वणटीच्या राशी पोंदा मोटारींत आडकून पडिल्ल्या आनी गंभीर जखमी जाल्ल्या अर्चना नायक हांकां भायर काडून रोखडेच स्वताच्या मोटारींत बसोवन तिका उपचारा खातीर जिल्हो हॉस्पिटलांत दाखल केली.

उपरांत तिका जिल्हो हॉस्पिटलांतल्यान गोंय वैजकी हॉस्पिटलांत दाखल केली. थंय तिचेर उपचार सुरू आसात. तकली, मान आनी हेर कुडीक गंभीर जखमो जाल्यात.

घडणुकेची म्हायती मेळटकूच म्हापशें उजो पालोवपी दळाचे उपअधिकारी अशोक परब हांच्या फुडारपणा खाला पंगड घडणूक थळार दाखल जालो. तशेंच पुलीस उपनिरिक्षक सुनील पाटील आनी हवालदार प्रभाकर परब हांचे सयत पुलिसांनी घडणूक थळार धांव घेतली. नगराध्यक्ष शुभांगी वायंगणकार, नगरसेविका प्रिया मिशाळ हांणीय घडणूक थळाक भेट दिवन पळोवणी केली.

उजो पालोवपी दळाच्या जवानांनी पालिका कर्मचाऱ्यांच्या आदारान रस्त्यार कोसळिल्ले राखणे वणटीचे फातर, माती आनी मोटार कुशीक काडली. हे घडणुकेचो पंचनामो हवालदार महेश शेटगांवकारान केलो.

मजगतीं, ही सेंट ब्रिटो हायस्कुलाची सुमार आठ मिटर उंचायेची राखणे वणत जीर्ण जाल्या. हे वणटीचे कुशीक माड आनी हेर झाडां आसून ती लेगीत कोसळपाचे धडेर आसात.

ही घडणूक भिरांकूळ आशिल्ली. हातूंत पुराय मोटारीचो चुरो जालो. तुळशीदास खेडेकार आनी हेरांनी वेळारूच घडणूक थळार धांव घेत आनी जखमी अर्चना नायक हिका मोटारींतल्यान भायर काडपा सयत तिका हॉस्पिटलांत दाखल करिमेरेनच्या धाडशी वृत्तीची तोखणाय म्हापश्यां जायत आसा.