भांगरभूंय | प्रतिनिधी
लिओ रॉड्रिगीस नगराध्यक्ष जावपाची शक्यताय
वास्को: मुरगांवचे नगराध्यक्ष दामोदर कासकार हांणी अलिखीत कबलाती प्रमाण आपल्या नगराध्यक्षपदाचो राजिनामो काल (सोमारा) दिलो. प्रभाग क्रमांक पंचवीसाचे नगरसेवक लिओ रॉड्रिगीज हांचें नांव नगराध्यक्षपदा खातीर मुखार आयलां. सत्ताधारी गटा कडेन भोवमत आशिल्ल्यान रॉड्रिगीज हांची नगराध्यक्षपदार बिनविरोध निवड जावपाची शक्यताय आसा. पूण येता त्या दिसांनी कांय घडामोडी घडत जाल्यार नगराध्यक्षपदा खातीर चुरस निर्माण जावपाची शक्यताय न्हयकारूं येना.
प्रभाग क्रमांक चाराचे नगरसेवक म्हूण वेंचून आयले उपरांत दामोदर कासकार हांची फाटल्या 27 मे 2021 दिसा नगराध्यक्षपदार निवड केल्ली. त्या वेळार आदले मंत्री मिलिंद नायक, आदले आमदार कार्लुस आल्मेदा आनी मंत्री मॉवीन गुदिन्हो हांच्या समर्थक नगरसेवकांनी कासकार हांकां तेंको दिल्लो. उपरांत विधानसभा वेंचणुके वेळार जाल्ले घडामोडींत आल्मेदा हांणी भाजपाचो राजिनामो दिवन काँग्रेसीक वचून मेळिल्ले. त्या वेळार तांच्या णव मदल्या सात समर्थक नगरसेवकांनी तांचो सांगात सोडलो ना. तशें आसलें तरी सत्ताधारी गटा कडेन 25 मदल्या 16 जाणांचें संख्याबळ आसा. जाल्यार विरोधकां कडेन णव जाणांचें संख्याबळ आसा.
कासकार हांणी 27 तारखेक राजिनामो दिवचो हे खातरि तांचेर चेपण हाडिल्लें. पूण कांय कारणाक लागून तांच्या राजिनाम्याक कळाव जाल्लो. ह्या प्रकरणांत वरिश्ठांचे सुचोवणे प्रमाण तांणी काल (सोमारा) नगराध्यक्षपदाचो राजिनामो पालिका संचालनालया कडेन धाडलो. कासकार हांची सुमार एका वर्साची कारकीर्द सुरळीत गेली. तांच्या राजिनाम्या विशीं मात वास्कोकारां मदीं चर्चा सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
