भांगरभूंय | प्रतिनिधी
प्रभारी सी. टी. रवी हांणी घेतलो मंत्र्यांच्या कामगिरीचो नियाळ
भांगरभूंय I प्रतिनिधी
पणजी : भारतीय जनता पक्षाचे प्रभारी सी. टी. रवी हांचे हाजिरेंत शुक्रारा पक्षाचे आमदार, मंत्री तशेंच पदाधिकाऱ्यांच्यो दीसभर बसका जाल्यो. मंत्रीमंडळ फेरचणुके विशीं चर्चा जाली पूण ठोस असो कसलोच निर्णय जावंक ना. प्रभारी सी. टी. रवी हांणी अहवाल सादर केले उपरांत दिल्ली सावन निर्णय जातलो, अशी म्हायती गोपांनी दिली.
भाजपाचे गोंय प्रभारी सी. टी. रवी बिरेस्तारा रातीं गोंयांत दाखल जाले. बिरेस्तारा रातीं आमदार दिगंबर कामत हांणी तांची भेट घेतली. शुक्रारा तांचे हाजिरेंत भाजप कार्यालयांत फाटोफाट तरेकवार बसका जाल्यो. भाजपाचे आमदार, मंत्री, पदाधिकारी हांच्यो बसका जाले उपरांत सुकाणू समितीची बसका जाली. मंत्रीमंडळ फेररचणूक वा नव्या मंत्र्यांच्या सोपुतविधी विशीं अधिकृतपणान कोणेच उलोवंक ना. हाका लागून मंत्रीमंडळ फेररचणुके विशीं आमदार तशेच मंत्र्यां मदीं मतभेद कायम आसात.
मुख्यमंत्र्यांच्या दिल्ली भेटी उपरांत प्रभारी रवी हांणी घेतल्यो बसका
मुख्यमंत्री डॉ. प्रमोद सावंत हे बुधवारा दिल्लींत गेल्ले. दिल्ली भेटींत तांणी केंद्रीय गृहमंत्री अमीत शाह हांची भेट घेतली. मुख्यमंत्र्यांची दिल्ली भेट मंत्रीमंडळ फेररचणुके विशीं आशिल्ली, अशी चर्चा राजकी मळार जाताली. पूण दिल्लींत मंत्रीमंडळ फेररचणुके विशीं चर्चा जावंक ना, अशें मुख्यमंत्री डॉ. प्रमोद सावंत हांणी सांगलें. मुख्यमंत्र्यांच्या दिल्ली भेटी उपरांत दुसरे दिसा सी. टी. रवी गोंयांत पावले. शुक्रारा दीसभर तांणी आमदार, मंत्री आनी पदाधिकाऱ्यांच्यो बसका घेतल्यो. हाका लागून बेगिनूच मंत्रीमंडळाची फेररचणूक जातली, अशें संकेत आसात.
निमाणो निर्णय दिल्लींत
प्रभारी सी. टी. रवी हांणी सकाळीं आमदारांची बसका घेतली. आमदार मायकल लोबो, दिगंबर कामत, अालेक्स सिक्वेरा, डिलायला लोबो, दाजी साळकार, प्रवीण आर्लेकार, केदार नायक आनी हेर आमदार बसकेक हाजीर आशिल्ले. उपरांत मंत्र्यांची बसका जाली. आमदार, मंत्री तशेच पदाधिकाऱ्यांचीं मतां सी. टी. रवी हांणी आयकून घेतली. दिल्लींत राष्ट्रीय अध्यक्ष जे. पी. नड्डा तशेंच केंद्रीय गृहमंत्री अमीत शाह हांकां ते बसकांचो अहवाल सादर करतले. हाचे उपरांत मंत्रीमंडळ फेररचणुके विशीं निमाणो निर्णय जातलो, अशी म्हायती गोपांनी दिली.
मंत्रीमंडळ फेरचणुके विशीं चर्चा जावंक ना
बसके उपरांत कृशी मंत्री रवी नायक, पर्यटन मंत्री रोहन खंवटे, येरादारी मंत्री मॉवीन गुदिन्हो, भलायकी मंत्री विश्वजीत राणे, कला आनी संस्कृती खात्याचे मंत्री गोविंद गावडे, मुख्यमंत्री डॉ. प्रमोद सावंत, आमदार मायकल लोबो, दिगंबर कामत, आमदार दाजी साळकार हांणी माध्यम प्रतिनिधींक म्हायती दिली. मंत्रीमंडळ फेररचणुके विशीं कसलीच चर्चा जावंक ना, अशें तांणी सांगलें.
उदक, वीज तशेंच मतदारसंघांतल्यो समस्या आमी मांडल्यो. मंत्रीमंडळ फेररचणुके विशीं आमकां खबर ना, अशें आमदार मायकल लोबो तशेंच दाजी साळकार हांणी सांगलें.
मंत्र्यांनी मतदारसंघांत वच्चें. लोकांच्यो समस्या जाणून घेवच्यो, असो सल्लो बसकेंत दिलो, अशें मंत्री रवी नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
