भांगरभूंय | प्रतिनिधी
पणजीः भजनाक गोंय सरकार अभिजात कलेचो दर्जो दितले. हाचे भायर संगीत, गायन आनी रचना ह्या मळार पं. नरहरीबुवा वळवयकार, पं. वामनबुवा पिळगांवकार, पं. तुळसीदास बोरकार, सोमनाथ च्यारी, मधुसूदन च्यारी आनी नरसिंह फडते हांच्या नांवान शिश्यवृत्ती आनी फेलोशिपी वांगडाच कला आनी संस्कृती खात्यांत पखवाज वादकांची पदां भरपाची घोशणा कला आनी संस्कृती मंत्री गोविंद गावडे हांणी केल्या.
कला अकादमींत जाल्ल्या मनोहरबुवा शिरगांवकार यादस्तीक भजन सर्तीच्या इनामां वांटपाच्या सुवाळ्यांत ते उलयताले. ह्या निमतान मुख्यमंत्री डॉ. प्रमोद सावंत, कला आनी संस्कृती खात्याचे संचालक सगुण वेळीप आनी हेर मानेस्त हाजीर आशिल्ले. मनोहरबुवा शिरगांवकार यादस्तीक भजन सर्ती गांवागांवांनी जातात. सर्तीची व्याप्ती विचारांत घेवन ही सर्त पंचायत पांवड्यार जावंक जाय अशें मंत्री गावडे हांणी सांगलें.
आतां मेरेन सरकारान ज्या कलांक अभिजात दर्जो दिला, त्यो कला सरकारी आनी शिक्षणीक पांवड्यार विकसीत जाल्यात. तांचे शिक्षणीक वर्ग सुरू जाल्यात. नाटक, संगीत, नृत्य आदी लोककलांचेर सरकार चड लक्ष दिता आनी हे बाबतींत गरजेच्यो सुविधा उबारपाक लागल्यात. तेच प्रमाण आतां मेरेन राज्यांत भजन कलेक उर्बा दिवपाक आनी प्रचार करपी कलाकारांक, शास्त्रीय कलेचो दर्जो सरकारान दितले. शास्त्रीय कले प्रमाण भजनांकय राज्यांत मान मेळटलो अशें तांणी स्पश्ट केलें.
संगीत, गायन आनी रचना ह्या मळार पं. नरहरीबुवा वळवयकार, पं. वामनबुवा पिळगांवकार, पं. तुळसीदास बोरकार, सोमनाथ च्यारी, मधुसूदन च्यारी आनी नरसिंह फडटे हांच्या नांवान शिश्यवृत्ती आनी फेलोशीप दितले. ताका लागून तरणाट्यांक गांवांगांवांनी वचून ही कला सादर करपाची संद मेळटली अशें तांणी सांगलें. हाचे भायर कला आनी संस्कृती खात्यांत तबला आनी हार्मोनियम शिक्षकांची भरती जाता तशीच संद पखवाजवादकांकूय दिवपाचो निर्णय सरकारान घेतला असोय उल्लेख मंत्री गावडे हांणी केला.
……………………………….
वाडीव गूण दिवपाचो विचार
बाल आनी बायलां भजन कलाकारांक उर्बा दिवपा खातीर गरजेचीं पावलां उबारपाचो सरकारान निर्णय घेतला. ताचो एक भाग म्हूण संवादिनी आनी पखवाज वादकांक वाडीव गूण दिवपाचो सरकार विचार करता अशेंय मंत्री गोविंद गावडे हांणी स्पश्ट केलें.
……………………………….
भजनीयुक्त गोंय करात
भजना कडेन वळपी लोक व्यसनाक वळचे नात. ताका लागून व्यसनमुक्त गोंया खातीर भजनयुक्त गोंय करपाचे आवाहन मुख्यमंत्र्यांनी केलें. गोंय पर्यटना वांगडाच सांस्कृतीक केंद्र जातले असो विस्वास तांणी उक्तायलो. कलेची जाणविकाय नाशिल्ल्यांनी कला अकादेमी विशीं उलोवंक फावना. कलाकारां कडल्यान बदल सुचोवण्यो सरकार निश्चीत विचारांत घेतले अशेंय मुख्यमंत्र्यांनी आश्वासन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
