भांगरभूंय | प्रतिनिधी
सांतिनेजची घडणूक, न्हांवपाक गेल्ले बांयचेर
भांगरभूंय । प्रतिनिधी
पणजी : सांतिनेजच्या आपटेश्वर सिद्धीविनायक देवस्थाना फाटल्यान आशिल्ले बांयंत बुडपी तरणाट्याक काडपाक गेल्ल्या सांताक्रूझच्या साई वैभव वायंगणकार (27) हाका बुडून मरण आयलें. मजगतीं वाटायल्ल्या तरणाट्याचेर बांबोळेच्या जीएमसींत उपचार चालू आसात. ह्या प्रकरणांत पणजी पुलिसांनी असैमीक मरण म्हूण नोंद करून तपास सुरू केला.
पणजी पुलिसांनी दिल्ले म्हायती प्रमाण शुक्रारा 23 मेक सकाळीं 10.30 वरांच्या सुमाराक सांतिनेजच्या आपटेश्वर सिद्धीविनायक देवस्थाना फाटल्यान आशिल्ले बांयचेर चार ते पांच तरणाटे न्हांवपाक आयिल्ले. ह्या वेळार तातूंतलो जॉनाथोन हो तरणाटो बांयंत बुडलो. त्या तरणाट्याक वाटावपा खातीर साई वैभव वायंगणकार हाणें बांयंत उडी मारली आनी बुडपी तरणाट्याक बरे भशेन भायर काडलो. मात ताका वाटावपा खातीर गेल्ल्या स्वता साईक बुडून मरण आयलें.
हाची म्हायती मेळटाच थळाव्या लोकांनी घडणुकेचे सुवातेर धांव मारली आनी हे घडणुकेची म्हायती पुलीस नियंत्रण विभागाक दिली. ते प्रमाण पुलीस निरिक्षक विजयकुमार चोडणकार हांच्या मार्गदर्शना खाला उपनिरिक्षक नितीन नायक हांणी हेर पुलिसांनी घडणुकेचे सुवातेर येवन पंचनामो केलो. वाटायल्ल्या तरणाट्याक बांबोळे जीएमसींत दाखल केला, थंय ताचेर उपचार चालू आसात. जाल्यार साई वैभव वायंगणकार हाची कूड मड्याकुडींत दवरल्या. ह्या प्रकरणांत पणजी पुलिसांनी असैमीक मरणाची नोंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
