भांगरभूंय | प्रतिनिधी
महाराष्ट्राच्यो एसटी बशी येनात पेडणें स्टॅण्डार
पेडणें: पेडणें कदंब बस स्टॅण्डार आंतरराज्य एसटी प्रवासी बशी कदंब बस स्टॅण्डार येनात. तशेंच सरकाराक निवेदन दिवन लेगीत त्या निवेदनाची दखल घेनात. हे खातीर फाल्यां (बिरेस्तारा) सकाळ सावन उपोशणाक बसपाची शिटकावणी ज्येश्ठ नागरीक जगन्नाथ पंडीत आनी नागरिकांनी दिल्या. तांणी तशें लेखी निवेदन पेडणें उपजिल्होधिकारी आनी पेडणें पुलिसांक दिलां.
फाटल्या कितल्याशाच म्हयन्या सावन आंतरराज्य एसटी प्रवासी बशी सावंतवाडी मार्गान पेडणें, म्हापशें, पणजी वा पणजी मार्गान म्हापशें, पेडणें, सावंतवाडी अश्यो वचपी बसी पेडणें बस स्टॅण्डार येनात. त्यो सगल्यो बशी बस स्टॅण्डार येवच्यो. हे खातीर ज्येश्ठ नागरीक जगन्नथ पंडीत हांणी फाटल्या आठ दिसां पयलीं पेडणें उपजिल्होधिकाऱ्यांक निवेदन सादर केल्लें.
त्या वेळार पेडणें उपजिल्होधिकारी दीपक वायंगणकार हांणी ह्या निवेदना संबंदी आपूण येरादारी खातें, एसटी म्हामंडळ आनी सरकारा कडेन धाडून दितलो अशें सांगिल्लें. पूण ह्यो प्रवासी बशी आयजूय पेडणें बस स्टॅण्डार येनाशिल्ल्यान आमकां उपोशण करपा बगर पर्याय नाशिल्ल्याचें जगन्नाथ पंडीत हांणी सांगलें, आनी फाल्यां (बिरेस्तारा) पेडणें सरकारी कॉम्प्लेक्सा मुखार उपोशणाक बसतलों अशें जाहीर केलें.
ह्या उपोशणाक स्वराज्य संस्था मांद्रेंचे प्रसाद शहापूरकार, ज्येश्ठ नागरीक भास्कर नारुलकार आनी विवीध संघटणांनी ह्या उपोशण निर्णयाक तेंको दिवन आपूणय एक दीस उपोशणाक बसतलों अशें जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
