भांगरभूंय | प्रतिनिधी
इंडीयन प्रिमियर लिगेचे (आयपीएल) 48वे मॅचींत पंजाब किंग्सान जबरदस्त फॉर्मांत आशिल्ल्या गुजरात टायटन्साक एकवटेन जाल्ले मॅचींत 8 विकेटींनी हारयलो.
पंजाबाक जैता खातीर 144 धांवड्यांची मोख मेळिल्ली. ताणें ती 15वे ओव्हरींत फक्त दोन विकेटी वगडावन मेळयली. शिखर धवनान नाबाद 62 धांवड्यांची खेळी केली. लियाम लिव्हिंगस्टोनान ताबडतोड बॅटींग करतना फक्त 10 बॉलांनी नाबाद 30 धांवड्यो केल्यो.
पंजाबाचें हें पांचवें जैत थारलें. जाल्यार दुसरे वटेन सेगीत पांच मॅची जिखल्या उपरांत गुजराताची ही पयली हार थारली.
धांवड्यांचो फाटलाव करपी पंजाबाची सुरवात बरी जाली ना. ओपनर जॉनी बॅयरस्टो परतून अपेशी थारलो. ताणें स बॉलांनी फक्त एक धांवडी केली. ताका मोहम्मद शमीन बाद केलो.
ते उपरांत धवन आनी भानुका राजपक्षे (40) हांणी पंगडाचो डाव मुखार व्हेलो. दुसरे विकेटी खातीर तांणी 87 धांवड्यांची भागिदारी करून पंगडाक बरे स्थितींत हाडलो. पंगडाचो स्कोर 97चेर पाविल्लो, त्या वेळार ल्यॉकी फर्ग्युसनान राजपक्षेक बाद केलो. ते उपरांत लिल्हींगस्टोनान आक्रमक बॅटींग करून मॅच रोखडीच सोंपयली. गुजराता वतीन मोहम्मद शमी आनी ल्यॉकी फर्ग्युसन हाणें दरेकी एक विकेट घेतली.
ते आदीं टॉस जिखून पयलीं बॅटींग करपाचो निर्णय घेवपी गुजरात टायटन्साक निर्धारिती 20 ओव्हरींनी 8 विकेटी वगडावन 143 धांवड्यो करप शक्य जाल्यो. गुजराताच्या साई सुदर्शनान नाबाद 64 धांवड्यो केल्यो. ताचेच बॅटिंगेक लागून गुजराताक 140 वयर धांवड्यो करप शक्य जाल्यो. पंजाब किंग्सा वतीन कगिसो रबाडान 4 विकेटी घेतल्यो. ताणें म्हत्वाच्या टप्प्याचेर पंजाबाक विकेटी मेळोवन दिल्यो.
साई सुदर्शनान आयपीएलांतलो पयलो अर्द शेंकडो 42 बॉलांनी पुर्ण केलो. तिसरे सुवातेर बॅटिंगेक आयिल्ल्या साईन पंगडा खातीर संकटमोचकाची भुमिका वठयली. ताणें 128चे स्ट्रायक रेटीन नाबाद 64 धांवड्यो केल्यो.
दुसरे वटेन पंजाबाच्या कगिसोन घातक बॉलींग केली. ताणें 35 धांवड्यो दिवन 4 विकेटी घेतल्यो. ताणें सेगीत दोन बॉलांचेर राहुल तेवतिया आनी राशिद खान ह्या फॉर्मांत आशिल्ल्या बॅट्समनांक बाद केले. रबाडा खेरीत ऋषी धवन आनी लियाम लिव्हिंगस्टोन हाणें दरेकी एक विकेट घेतली.
चवथे ओव्हरी मेरेन गुजराताचे दोनूय ओपनर तंबूंत परत गेल्ले. शुभमन गिल 9 धांवड्यो करून धांवबाद जालो, जाल्यार वृद्धिमान साहा 21 धांवड्यो करून तंबूंत परतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
