भांगरभूंय | प्रतिनिधी
ती म्हणल्यार स्त्रीशक्ती, एका तेंपार रांदप वाडप करपी पूण आयज दादल्यां बराबरीन चांद्रयान 3 चे बांदावळींतय आशिल्ली.
शरिरान दुबळी आसुनूय 33 टक्के राखीवतेंतल्यान नगरपालिका, पंचायतींचेर ती पावली. निर्णय क्षमतेंतल्यान 50 टक्के राखीवतेचेर संसद, विधानसभेर वचपाचो तिचो मार्ग आतां मेकळो जातलो अशी आस्त
आसा.
एक राष्ट्र एक वेंचणूक विशयाचेर नियुक्त केल्ले समितीन देशाचे घटनेंतल्या समानतायेच्या अधिकारांचो अभ्यास करून सुचोवण्यो तिका फुडें व्हरपा खातीर जावच्यो. समानतायेचो तिचो हक्क दितना सुरवेक तिचे खातीर तजवीज जावची. हालीं देश आनी राज्य पांवड्या वयल्यो घडणुको पळयल्यार कितेंय जालें की तिचे कडेन बोट दाखोवप सोंपें जालां. तिचे खातिरूच न्हय राजकी भोवमताचेर साबार भासाभास नासतना केल्ल्या कायद्यां मदीं उणाकपणा आसात. ते खातीर खर गुन्यांव करुनूय गुन्यांवकार मेकळे जातात, भोंवतात, लोकसभा, विधानसभेर, पंचायत, नगरपालिकेर पावतात. गुन्यांवकारांत तिचो आसपाव आसचो ना अशें न्हय पूण दादल्या परस तो कमी आसा.
उच्च शिक्षण घेतिल्ली, समाजकारणांतली, आवाज उठोवपी अस्तुरी लोकसभा, विधानसभे मेरेन व्हडा संख्येन पावल्यार शक्तीमान कायद्यांची अपेक्षा आसा. देश, राज्य पांवड्यार ती राजकारणांत दिसप (कायद्यांनी) गरजेचें. संद मेळ्ळ्यार आमचे हे भांगरभुंयेंतय तिचें राज्य परतून येतलें. एका तेंपार मूठभर आशिल्लें तिचें आंगण आयज वडांच्या खांदयां वरी जालां. सुदारप जागरुतायेंतल्यान ती लोकसंख्येंत, मतदारसंख्येंत समानतायेच्या पांवड्यार पावल्या. समेस्तांनी, घरच्यांनी, कुळारच्यांनी सुने धुवेक तेंको दिल्यार राखीवता नासतनाय ती राजकारणांत पावता, राष्ट्रपतीय जाता. मागीर संसदेर व्हडा संख्येन वचपाक आडमेळीं कित्याक? भारत, इंडियान एकवटान निर्णय घेतल्यार ती लोकसभा, राज्यसभा, विधानसभेंत 50 टक्क्यांनी कित्याक आसची न्ही? हाताचें बोट धरून फिरपाक ती आयज सवण्या पील उरूंक ना. शिक्षणांतल्यान ब्रह्मांडांतय भोंवतना चंद्र सुर्याच्या अभ्यासांत ती वांटो घेता.
राष्ट्रपिता महात्मा गांधींचे शिकवणे प्रमाण तिचें एक पावल फुडें पडप म्हणल्यार समाज सुदारप. हालींच्या घडणुकांचो अभ्यास केल्यार ती बळिश्ट जाता तें ताका सोंसना हें होलमता. संशयकल्लोळांतल्यान तिका ना करप लुकसाणेचें अशें ताणें चिंतल्यार, मानसीकता बदलल्यार तोय सुदारतलो. तो तिची शक्त जाल्यार तिका बळगें, राखण मेळटली तेन्ना संसद, विधानसभेंत धाडात म्हणून मागपाचीय गरज उरची ना.
संसद, विधानसभेंत 50 टक्क्यांनी दिसची हें तिचेंय सपन, फाटल्या 75 नासलें तरी साडेतीन दसकांतलें. साडेतीन दसकां आदीं पणजेंत पत्रकारिता करतना तिची म्हजी इश्टागत वाडली. राज्य महिला आयोगाचो बुन्यादीचो वावर करतना तिचे वांगडा आमकां तांणी बळिश्ट, सक्षम केलें. पत्रकार चंद्रकांत केणी, चंद्रकांत घोरपडे, लक्ष्मण जोशी, आनंद आगाशे, इब्राहिम अफगाण, सुरेश स नाईक हांचो तातूंत म्हत्वाचो वांटो. गोमन्तक दिसाळ्यांतल्या उप संपादपी, मुखेल उपसंपादप्यांक शिस्ती खातीर तापोवपी, उतरांनी बडोवपी, शिकोवपी घोरपडे सर आमचे मदीं ना. तांचींच उतरां न्यायालयाचे अस्तुरे विशींच्या उतरावळींतले पुस्तिकेंत आसपावल्यांत.
फुडार सांगपाची पत्रकार घडोवपाची तांक साडेतीन दसकां आदल्या संपादप्यां भितर आसली. तांच्या शिश्यां भितर ती आसा पूण भोवमाध्यमी पत्रकारितेच्या युगांत तेय घुस्पल्यात. गोमन्तक दिसाळ्यांत छापून येवपी मटको तांच्या येत्नांतल्यान, पयलींचे मुख्यमंत्री प्रतापसिंह राणे हांचे राजकी इत्साशक्तींतल्यान बंद जालो. मटको, गडगडो आयज गोंयांत जात्रे पुरतो उरूंक ना, तो गोंयच्या कोनशा-कोनशांनी चलता. कायद्यान घटाय मेळिल्ल्यान कसिनो भुंये वयल्या कांय हॉटेलांनीय आसात.
सोरो जिवाक बरो, फेणयेक वखदाचे दाखले दिवपी, कसिनो हाडपा खातीर कायदे करपी लोकप्रतिनिधी, मंत्री अजुनूय आसात. मटक्याची सावळी झोपडपट्टेचेर पडून गुटखो, सोऱ्याचे तंदरेंत खून जातात. पयलींचे रेवडी संस्कृतायेंतल्यान झोपडेंत टीव्ही आसात. मोबायलार जितेगे, जितोगे करीत जायराती, सिरियलींचो प्रभाव भायल्या भितरल्या कामगारांचेर पडचो ना अशें न्ही. कशी मोडून काडटले ही वेसनाची व्हड जावपी सांखळ? आदले कांय एन जी ओ सरकाराचे वीज उदकाचे सल्लागार. पत्रकारांची फुडली पिळगी तयार जावंक ना तेंच एन जी ओ चें गोंयांत जालां.
सोरो, कसिनो, मटको, उदक, वीज, कोयर सगलें तिका बादता, जोडटाय. गोंय पेटपाची भास कोंकण रेल्वे येतना पूण कोंकण रेल्वे आयली, आयज ती एक्सप्रेसय जाल्या. तिका धांवतना पांयांत पांय घालून उडोवपी नावाडगे आसतले पूण ती धांवतलीच. तिचे खातीर कायदे साडेतीन दसकांच्या झुजांतल्यान जाल्यात, निर्भया मागल्यार निधीय मेळटा. कायदे समजून घेतल्यार लोकसभा, विधानसभेंत वतना फायदो. मिडियांतल्या भावानो, भयणीनो भोवमाध्यमी जातना तुमचे खातीर, तिचे खातीर आशिल्ले कायदे समजून घेयात. इतिहास छापतात, छापचे आदीं, उपरांत तपासतात? चांद्रयान 3, आदित्याचे बांदावळींतले, अजून संसद, विधानसभेंत पन्नास टक्क्यांनी न दिसपी ते स्त्रीशक्तीक सलाम.
म्हारगायेंत चवथीचे लाडू, नेवऱ्यो तिच्योच. घराच्यो चावयो तिच्याच हातांत, देशाचें अर्थकारणय तिचे कडेन. ती नासल्यार संवसारय अस्तमेक वतलो सरोगेसीच्या युगांतय. नव्या युगांत तीय घुस्पता, खंय? त्या घुस्मटांतल्यान सुटपाचो एक मार्ग कायद्याचो, दुसरो एकामेकांक सांबाळून घेवपाचो. तेंच सांगात, भायल्यांकय आनी भितरल्यांकय तिका संसदेर, विधानसभेर धाडून. दंगल ते मंगळा मेरेन पावतना आई बदलता. कित्याक?
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
