भांगरभूंय | प्रतिनिधी
भांगरभूंय । पत्रक
पणजीः तन्मार वीज प्रकल्पा विशीं आत्मकेंद्रीत राजकारणी आशिल्ल्या वीज मंत्री सुदिन ढवळीकार हांणी सध्या घेतिल्ले भूमिकें विशीं अजाप करपा सारकें कांय ना. ह्या प्रकल्पाचो पर्यावरणाचेर सामको वायट परिणाम जातलो म्हणून ताका विरोध करपी डवळीकाराक मंत्रीपद मेळिल्ल्यान तांचें मत परिवर्तन जालां अशें आम आदमी पक्षाच्या गोंय समितीचो उपाध्यक्ष सुरेल तिळवे हांणी सांगलें.
तन्मार प्रकल्प जालो ना जाल्यार महाराष्ट्र आनी कर्नाटक सरकारान जशी वीज दरवाड केल्या तशी गोंय सरकाराक करची पडटली अशें ढवळीकार हांणी बिरेस्तारा सांगल्लें. स्वताचो राजकी सुवार्थ सादलो म्हणून ढवळीकार आतां तन्मार प्रकल्पाचें समर्थन करपाक लागल्यात असो आरोप तिळवे हांणी केला. कायद्याचो विचार करनास्तना ही झाडां मारल्यांत ढवळीकार ताच्या समर्थन करपाक फुडें सरतलो काय कितें असो प्रश्न तिळवे हांणी केला.
तन्मार प्रकल्पाक लागून धारबांदेडे हांगा हजारांनी झाडां मारल्यांत.सर्वोच्च न्यायालयान गोंयांक ह्या विध्वंसा पसून तशेंच राजकी चेंपणा पूसन वाटायलां.
स्वताच्या राजकी सुवार्था खातीर कितळ्याच फावट यू-टर्न घेवपी ढवळीकारान गोंयकारांचो वि्स्वास वोगडायला. प्रमोद सावंत हांका मुख्यमंत्री म्हणून तेंको दिवचो ना तशेंच वेंचणुके वेळार भाजपा कडेन युती करचो ना अशें सांगपी ढवळीकारान आपल्या मंत्रीपद मेळटा म्हणून सावंत हाका आपलो फुडारी मानून भाजपा सामकार लोटांगण घातलां. आपल्या सुवार्था खातीर ढवळीकार कितेंय करपाक फाटीं रावना अशें तिळवे हांणी म्हणलां.
आम आदमी पक्ष हेर राजकी पक्षां भशेन फटीचीं आस्वासना दिना. आमचे फुडारी पयले सावन तन्मार प्रकल्पाक विरोध करीत आयल्यात आनी आमचे दोनूय आमदार येता त्या विधानसभा अधिवेशनात तन्मार प्रश्न विधानसभेंत मांडटले अशें सुरेल तिळवे हांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
