चुकीची बातमी दिल्ले खातीर रिपब्लीक टीव्हीन माफी मागची

भांगरभूंय | प्रतिनिधी

आमदार कार्लुस फेरेरा: माफी मागली ना जाल्यार कायदेशीर कारवाय

म्हापशें: भाजपाच्या राष्ट्रपतीपदाच्या उमेदवाराक हांवें मतदान केल्ल्याची चुकीची बातमी दिल्या. ही बातमी फाटी घेवन रिपब्लीक टीव्हीन भौशीक रितीन माफी मागची अशी मागणी हळदोणेंचे आमदार अ‍ॅड. कार्लुस फेरेरा हांणी उजवाडायिल्ल्या पत्रकांतल्यान केल्या.

काँग्रेसीचे 11 आमदार आसात. राष्ट्रपतीपदाची वेंचणूक गुपीत बॅलेट पेपर पद्दतीन जायत आशिल्ल्यान नेमा प्रमाण सगले राजकी पक्ष तांच्या आमदारांक, खासदारांक व्हीप जारी करूंक शकनात.

विधानसभा संकुलांत मतदान जाले उपरांत पत्रकारांनी म्हाका म्हजे निवडी विशीं प्रस्न विचारिल्लो. मतदान गुपीत बॅलेट पेपरा वरवीं जाल्ल्यान हांवें जाप दिवपाची टाळून म्हजे सद्सदविवेक बुद्धीक पटलो. फक्त तांकां मत दिल्ल्याचें सांगिल्लें.

हांव विक्रे खातीर उबो ना. क्रॉस व्होटींग केल्ल्याचें कसलेंच उलोवप हांवें केल्लें ना. लोकशायेची मुल्ल्यां सांबाळून गोंय वाटावप हें म्हजें कर्तव्य आसा अशें फेरेरा हांणी स्पश्ट केलें.

वयर दिल्ले खबरां चॅनलान रोखडीच आपली बातमी फाटीं घेतली ना आनी माफी मागली ना जाल्यार कायदेशीर पावलां उबारचीं पडटलीं अशीं शिटकावणीय अ‍ॅड. फेरेरा हांणी दिली.

रिपब्लीक वाहिनीन हांवें राष्ट्रपतीपदाचे वेंचणुकेंत क्रॉस व्होटींग केल्ल्याचो दावो केल्लो. हांवें केन्नाच म्हणूंक नाशिल्लीं उतरां म्हज्या तोंडांत घालून चुकीचो संदेश दिलो. म्हजे नांव आनी प्रतिमा म्हेळी करपाचो यत्न तांणी केलो. हांवें रिपब्लीक चॅनलाक सुचोवणी पत्र धाडलां आनी तातूंत जाहीर माफी मागपाची मागणी केल्या. तांणी माफी मागली ना जाल्यार कायदेशीर मार्ग आपणावचो पडटलो अशें अ‍ॅड. फेरेरा हांणी उजवाडायिल्ल्या पत्रकांत म्हणला.