भांगरभूंय | प्रतिनिधी
काणकोण,प्रतिनिधी: सोमारा सकाळीं एकाक सुमार गांवडोंगरी हांगा जाल्ल्या अपघातांत मूळ कर्नाटक आनी सद्या न्युवाडो, भाटपाल हांगा रावपी पुंडलीक लक्ष्मण काकडे (२०) हाका मरण आयलें.
चड म्हायती प्रमाण आयतारा रातच्या वेळार पुंडलीक काकडे, रोहीत रुपेश नायक (१९, पणसुलें काणकोण), गणेश शंकर दोडामनी (२६, मैथळ, श्रीस्थळ) हे तरणाटे कर्वे गांवडोंगरी हांगा आपल्या एका इश्टाक पावोवपा खातीर गेल्ले. वतना डब्बल सीट ते गेल्ले. कर्वे हांगा इश्टाक पावोवन परत येतना हे तिगूय ट्रिपल सीट येताले. गांवडोंगरी वोल्तार तांची दोन चाकी पल्सर एनएस रस्त्याच्या कुशीक वचून एका झाडाक नेटान धपको दिलो. तातूंत पुंडलीक लक्ष्मण काकडे हो गंभीर जखमी जालो. तशेंच रोहीत रुपेश नायक होय जखमी आसा. जाल्यार गणेश दोडडामनी हाका दुखापत जाल्या.
पुंडलीक काकडे हाका काणकोण हॉस्पिटलांत हाडलो तेन्ना ताका मरण आयिल्ल्याचें सांगलें. ताचे कुडीचो पोस्टमार्टेम केल्या उपरांत ताची कूड तांच्या कुटुंबियां कडेन दिल्या. रोहीत नायक हाचेर सध्या जिल्हो हॉस्पिटलांत उपचार सुरु आसा, अशी म्हायती काणकोण पुलीस स्टेशनाचे निरीक्षक चद्रकांत गांवस हांणी दिली.
पुंडलीक काकडे हो खाजगी वाहन चलोवपाचें काम करतालो. जाल्यार ताचे आवय-बापूय घराघरांनी वचून आयदणां विकपाचें काम करतात. रोहीत नायक हाच्या बापायक कांय वर्सां आदीं मरण आयिल्लें. जाल्यार ताची आवय काणकोण चावडी बाजारांत रस्सा आमलेट गाड़ो चलयता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
