भांगरभूंय | प्रतिनिधी
पणजीः कदंब म्हामंडळाच्या स मार्गांनी दर दिसा नव्यो लक्झरी बशी चलतली. म्हापशें ते पुणे – शिर्डी, म्हापशें ते बंगळुरू, गोंय ते हैदराबाद, गोंय ते मुंबय ह्या मार्गांचेर वातानुकूलीत बस सेवा आसतली. गोंय-मंगळुरू-धर्मस्थळ आनी गोवा-होस्पेट-हंपी ह्यो विना वातानुकूलित बस सेवा आसतल्यो. म्हामंडळाच्या संकेतथळार बुकींग सेवा सुरू केल्या.
म्हापशें ते बंगळुरू आनी परत (एसी स्लीपर) बस म्हापशें, पणजी, मडगांव ते अनमोड, धारवाड, हुबळी ते बंगळुरू मेरेन म्हापशें, पणजी, मडगांव, फोंडें मार्गान वतली. ही बस म्हापशें सावन सांजवेळा 5:30 वरांचेर सुटतली. बंगळुरू सावन सांजवेळा 7.45 वरांचेर सुटतली. म्हापशें ते पुणे-शिर्डी बस सांजवेळा 5 वरांचेर म्हापशें सावन सुटतली. ही गाडी पणजी, मडगांव, बांदा आनी पुण्यांतल्यान शिर्डीक वतली.
गोंय-हैदराबाद ही गाडी मडगांवच्यान सांजवेळा 4 वरांचेर सुटतली. ही गाडी मडगांव, पणजी, म्हापशें, सांखळी, बेळगांव, विजयपुरा, कलाबुर्गी ह्या मार्गान हैदराबाद पावतली. हाचे भायर गोंय-मुंबय (धोबी तलाव) मार्गाचेर बेगिनूच वातानुकूलित स्लीपर बस सेवा सुरू जातली. ही गाडी मडगांव सावन सांजवेळा 6 वरांचेर सुटतली आनी पणजी, म्हापशें, बांदा, झाराप, चिपळूण, खेड ह्या मार्गान मुंबय वतली.
प्रवाशांची मागणी मतींत दवरून कदंबान दोन नव्या मार्गांचेर बस सेवा दिवपाचो निर्णय घेतला. गोंय-मंगळुरू-धर्मस्थळ बस कारवार, अंकोला, कुमठा, होन्नावर, भटकळ, कुंडापुरा, उडुपी ह्या मार्गान मंगळुरू वतली. गोंय-हॉस्पेट-हंपी बस सेवा फोंडें, अनमोड, हुबळी, कडक, कोप्पले वरवीं हम्पी पावतली. चड म्हायती खातीर कदंब संकेतथळाक भेट दिवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
