भांगरभूंय | प्रतिनिधी
विधानसभेंत मुख्यमंत्र्यांनी फाटल्या साडेसात वर्सांतली दिली म्हायती
पणजी: फाटल्या साडेसात वर्सांत गोंयांतल्या विवीध पुलीस स्टेशनांनी 214 सायबर गुन्यांवांची नोंद जाल्या. तातूंतल्या 62 प्रकरणांचो तपास लावपाक सायबर पुलीस विभागाक येस आयलां अशी म्हायती मुख्यमंत्री तशेंच गृह मंत्री डॉ. प्रमोद सावंत हांणी आमदार विरेश बोरकार हांणी विधानसभेंत विचारिल्ल्या लेखी प्रस्नाचे जापेंतल्यान दिली.
गोंयांत 2015 वर्सा 21, 2016 आनी 2017 वर्सा दरेकी 14, 2018 वर्सा 35, 2019 वर्सा 18, 2020 वर्सा 41, 2021 वर्सा 38 आनी 30 जून 2022 मेरेन 33 अशें वट्ट 214 सायबर गुन्यांव विवीध पुलीस स्टेशनांनी नोंद जाल्यात.
तातूंतल्या 62 गुन्यांवांचो सायबर विभागाच्या पुलिसांनी तपास लावन, उरिल्ल्या प्रकरणांचो तपास सुरू आसा अशें मुख्यमंत्र्यान जापेंत म्हणलां. बोरकार हांणी एका उपप्रस्नांत 2017 ते आतां मेरेन दक्षीण गोंयांत नोंद जाल्ल्या सायबर गुन्यांवांची म्हायती मागयिल्ली. ताचेर जाप दितना मुख्यमंत्र्यानी दक्षीण गोंयांत 2017 वर्सा 14, 2018 वर्सा 35, 2019 वर्सा 18, 2020 वर्सा 41, 2021 वर्सा 38 आनी 2022 वर्सा 30 जून मेरेन 33 सायबर गुन्यांवांची नोंद जाल्ल्याचें म्हणलां.
रायबंदरा सायबर क्रायम विभागांत वट्ट कितले कर्मचारी आसात हाची म्हायती आमदार विरेश बोरकारान मागयिल्ली. ताचेर ह्या विभागांत सद्या दोन पुलीस निरिक्षक, दोन उपनिरिक्षक दोन सहाय्यक पुलीस निरिक्षक, एक हेड कॉन्स्टेबल आनी 16 पुलीस कॉन्स्टेबल कार्यरत आसात. ह्या कर्मचाऱ्यांक सायबर गुन्यांवां कडेन संबंदीत प्रकरणां हाताळपा खातीर प्रशिक्षीत करून सक्षम केल्यात अशेंय मुख्यमंत्र्यांनी जापेंत म्हणलां.
गोंयांत आनीक खंयच्या शारांत सायबर क्रायम विभाग स्थापन करतले? असो प्रस्न आमदार विरेश बोरकारान विचारिल्लो. ताचेर जाप दितना सद्या तरी सरकाराचो तसो कसलोच विचार ना अशें मुख्यमंत्री डॉ. प्रमोद सावंत हांणी लेखी जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
