भांगरभूंय | प्रतिनिधी
24 वरांत सरासरी 146 मिमि. पावसाची नोंद
स्मार्ट पावसाक लागून स्मार्ट सीटीच्यो भोयोभोयो
पणजे 8 इंचा परस चड पावस, आयज ऑरेंज अॅलर्ट
पणजी : मंगळारा रातीं ते बुधवार सकाळ मेरेन पणजे 8 इंचां परस चड पावस पडिल्ल्यान रस्ते उदकापोंदा वचपा सयत मळा वाठारांत घरांनी उदक घुसलें. पयलीच्या वर्सांनी पावस पडले उपरांत पणजेची जी गत जाताली, तशीच गत अंदूंय जाल्या. नव्यानूच केल्ल्या रस्त्यांचें डांबर उखडपा सयत फोंडकुलां तयार जावपाक लागल्यात. बुधवारा सकाळीं 18 जून रस्तो, कला अकादमी, कांपाल, पोरणें सचिवालय, आंबेडकर उद्यान ह्या सगल्या रस्त्यांचेर उदक भरिल्लें.
अंदूंच्या मॉन्सून हंगामांत आतां मेरेन सगल्यांत चड पावस मडगांव (26.14 इंच) पडलो, सगल्यांत उण्या पावसाची नोंद मुरगांव (17.41) केंद्राचेर जाल्या. सोमार आनी मंगळारच्या 24 वरांत पणजे सगल्यांत चड 8 इंच पावसाची नोंद जाल्या. पणजेंतलो हो पावस फाटल्या 50 वर्सांत जूनांत पडिल्ल्या पावसा परस चड आसा.
उटंगाराच्या पावसाक लागून बुधवारा सकाळीं लोकजीण विस्कळीत जाली. उदकांतल्यान मार्ग काडत वाहन चलयतना वाहन चालकांक बरेच त्रास जाले. विद्यालयांत विद्यार्थी तशेंच कार्यालयांनी कर्मचारी उसरां पावले.
मंगळारा दनपारां पावसाचे प्रमाण उणें आशिल्ले. मंगळारा रातीं सात वरांचेर पावसाक सुरवात जाली. मंगळारा रातीं रस्ते उदकांत भरून दुकानांनी उदक घुसलें. मंगळारा रातभर पावस पडत रावलो. हाका लागून बुधवारा पणजेतले सगळे रस्ते बुडले. नागरीक तशेंच सामाजीक वावुरप्यांनी स्मार्ट सिटीचीं कामां तशेंच कंत्राटदारांचेर खर टिका केली. रस्त्या वयल्या उदकाक लागून अदींमदीं येरादारीची कोंयडी जाताली. मळा वाठारांतल्या घरांनी उदक घुसलें. इतली वर्सां पावसांत घरांनी उदक येवंक नाशिल्लें. अंदूं मात पयलेच खेपे घरांनी उदक घुसलें, अशी म्हायती घर धनयांनी दिली.
बुधवारा दनपारां पावसाचो नेट उणो जालो. हाका लागून दनपारा उपरांत पणजेची स्थिती सामान्य जाली.
भरती वेळार जेन्ना पावस पडटा, तेन्ना पणजी बुडटा, असो अणभव आसा. हे खेपे लेगीत तशेंच जाले. स्मार्ट सिटीच्या कामाक लागून समस्या पयस जावंक ना, अशें आपाचे फुडारी वाल्मिकी नायक हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
