भांगरभूंय | प्रतिनिधी
दिवचलः वाठारदेव- सर्वणां लयराई देवीच्या होमखणाचें सोंवळें पाळपी धोंडाक न्हंयेंत बुडून मरण आयलें. न्हांवपाक गेल्ले कडेन फीट आयिल्ल्यान हो तरणाटो उदकांत बुडलो. दामोदर (अभिषेक) दलपत नायक (२३, काजीवाडो- विठ्ठलापूर-सांखळे) अशें ताचें नांव. ही घडणूक बिरेस्तारा १६ एप्रिलाक दनपारां घडली.
मेळिल्ले म्हायती प्रमाण, अभिषेक अंदूं तिसऱ्या वर्सा धोंड म्हणून उपास करपाचो आशिल्लो. आयच्यान उपास सुरू जावपाचो आशिल्लो. हे खातीर तो सगळे सामान घेवन देवळा लागीं आयिल्लो. सगळे धोंड न्हंये लागीं जमिल्ले. सगळेच आपआपल्या कामात व्यस्त आशिल्ले. दनपारां अभिषेक पोतयेंतले कपडे घेवन धुंवपाक न्हंयेच्या उदकांत देंवलो. तेन्ना ताका उदकांत फीट आयली आनी तो उदकांत पडलो. कोणाकूच हें कळ्ळें ना. मजगतीं एका धोंडाक ताचे पांय उदकांत उफेताना दिसले. ताणें रोखडोच थंय वचून ताका भायर काडलो. मागीर ताणें पोट दामून उदक भायर काडपाचो यत्न केलो. पूण, ताच्या तोंडांतल्यान फेस भायर सरता तें तांकां दिसलें. मागीर 108 एम्ब्युलन्स आपयली. तांणी तपासणी केली तेन्ना ताका मरण आयिल्ल्याचें कळ्ळें. ते उपरांत पयलीं ताका साखळेच्या भलायकी केंद्रांत व्हेलो आनी उपरांत पोस्टमार्टमा खातीर जीएमसींत धाडलो.
दिवचल पुलिसांनी हे घडणुकेचो पंचनामो केलो. मरणाचे नेमके कारण पोस्टमॉर्टम अहवाल आयले उपरांतच स्पश्ट जातलें अशें सूत्रांनी सांगलें. मजगतीं, अभिषेक हो साखळेच्या तोणयेश्वर शिगमोत्सव मंडळाचो सक्रीय वांगडी आशिल्लो. ताच्या फाटल्यान आवय- बापूय, लग्न जाल्ली भयण आनी एक भाव अशें कुटुंब आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
