भांगरभूंय | प्रतिनिधी
पणजीः राष्ट्रीय शालेय खेळाचो एक भाग बीच व्हॉलीबॉल २१ ते २३ एप्रील मजगती मिरामार हांगासर जातली. पुराय देशभारांतल्यान शालेय विद्यार्थी हे १७ वर्सा पिराये सकयलच्या बीच व्हॉलीबॉल सर्तींत वाटेकार जातले. ह्या खेळाच्या आयोजना वरवीं गोंयांत खेळां संस्कृती तयार करपाचो आमचो यत्न चल्ला, अशें खेळां मंत्री रमेश तवडकार हांणी सांगलें.
पणजे आपयल्ले पत्रकार परिशदेंत खेळां मंत्री रमेश तवडकार उलयताले. ह्या वेळार खेळा आनी युवा वेवहार खात्याचे संचालक अजय गावडे आनी हेर अधिकारी हजर आशिल्ले.
ह्या वेळार उलयतना तवडकार हांणी सांगलें, शालेय खेळ फेडरेशन आनी खेळां खातें हांच्या जोडपालवान २१, २२, आनी २३ एप्रिलाक मिरामार हांगासर अंडर-१७ बीच व्हॉलीबॉल सर्त घडोवन हाडटले.
राष्ट्रीय शालेय खेळ हे पुराय देशभर जातात. हाचोच एक भाग म्हण बीच व्हॉलीबॉल आमी गोंयां घडोवन हाडपाक सांगलां. दर्यादेगेर आशिल्लीं २० राज्य आनी तांचे १०० खेळगडे हे बायलां आनी दादले गटांत खेळटले, अशी म्हायती तवडकार हांणी दिली.
भुरग्यांची प्रतिभा विकसीत करून तांकां अंतरराष्ट्रीय पांवड्यार खेळपा खातीर संद दिवप. तशेच म्हाल, जिल्लो, राष्ट्रीय पांवड्यार विवीध खेळात खेळगड्यांचो पावडो वाडोवपाच्या हेतान शालेय खेळां फेडरेशन हे खेळ घडोवन हाडटा. बीच व्हॉलीबॉ़ल हाचोच एक भाग जावन आसा, अशें तवडकार हांणी म्हणलें.
२१ एप्रिलाक सकाळी ६ वरांचेर मिरामार बीच व्हॉलीबॉल सर्तीचे उक्तावण जातले. मुख्यमंत्री डॉ. प्रमोद सावंत उक्तावणाक हजर आसतले. २३ एप्रिलाक सर्तीची सांगता जातली. बीच व्हॉलीबॉलाचे आयोजना वरवीं आमी खेळां मळार वेगळी वळख दिवपाक सोदता. तशेंच हे सर्तीक खेळां महोत्सावचें रुप दिवपा खातीर आमचो यत्न चल्ला, अशें तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
