भांगरभूंय | प्रतिनिधी
पणजी: बागा दर्यावेळेवेल्या टिटोज लेन वाठारांत एके विदेशी बायले कडेन अश्लील उलोवन तो व्हिडियो सोशल मिडियाचेर अपलोड केल्ल्या प्रकरणांत गोंय पुलिसांनी कारवाय केल्या. ह्या प्रकरणांत तांणी लखनौच्यान सौरभ सहानी (४८) ह्या दुबाविताक अटक केल्या. स्वताच्या युट्यूब चॅनेलाचे सबस्क्रायबर्स वाडोवपा खातीर संबंदीत बायलेचो व्हिडियो अपलोड केल्ल्याची कबुली दुबावितान दिली. ह्या प्रकरणाक लागून आतां गोंयांत येवपी पर्यटकांची पर्सनल स्पेस आनी पर्यटनाचे सुरक्षिततायेचो प्रस्न परत मुखार आयला.
कांय दिसां सावन सोशल मीडियाचेर एक व्हिडिओ बरोच व्हायरल जाल्लो. तातूंत कांय अनवळखी तरणाटे बागाचे टिटोज लेनी लागसार एके विदेशी बायलेक वायट वागणूक दितना दिसतात. तिचे कडेन अश्लील उलोवन तिचो विनयभंग करतना दिसतात. ह्या व्हिडियोची दखल घेवन पुलिसांनीं गुन्यांव नोंद केल्लो. विनयभंग, अश्लील वागणूक आनी अश्लील आशय आशिल्लो व्हिडियो पातळिल्ल्याचे गंभीर आरोप ह्या प्रकरणांतल्या दुबाविताचेर केल्यात.
पणजेच्या सोशल मीडिया मॉनिटरिंग सेलान ह्या व्हिडियोचो तांत्रीक तपास केलो, हो व्हिडिओ ’Realduniya007’ ह्या युट्यूब चॅनेलाचेर आनी ‘सौरभ सहानी’ नांवाच्या फेसबूक प्रोफायलाचेर अपलोड केल्ल्याचें कळ्ळें. टॅक्नीकल एनालायसीसा वरवीं दुबाविताचें लोकेशन लखनौ आशिल्ल्याचें स्पश्ट जातांच, क्रायम ब्रांचाचो एक पंगड उत्तर प्रदेशाक पावलो. थंयच्यान सौरभ सहानी हाका ताब्यात घेवन गोंयांत हाडलो आनी अटक केली. ताचो चॅनल सध्या पुलिसांचे सुचवणे वयल्यान युट्युबान काडला.
चवकशे वेळार सौरभान गुन्यांव कबूल केला. ताणें सांगलें, १९ सप्टेंबर २०२४ तारखेर सकाळीं सुमार १:१९ वरांचेर तांणी हो व्हिडियो रॅकोर्ड केल्लो. सुरवातेक हो व्हिडियो हार्ड डिस्कांत स्टोअर करून दवरिल्लो. उपरांत युट्युबाचे सबस्क्रयबर्स वाडोवपाक ताणें १२ एप्रिल २०२६ दिसा हो व्हिडियो अपलोड केलो. पूण अपलोड करतना तांणी पिडेस्त बायलेचें मुखामळ ब्लर करूंक ना. हाका लागून तिची वळख उक्तडार आयली. युट्यूबवार उणे व्ह्यूज मेळिल्ल्यान तांणें तो व्हिडियो वैयक्तीक फेसबुक अकावंटाचेर पोस्ट केलो.
क्रायम ब्रॉंचान ह्या प्रकरणांत पिडेस्त विदेशी बायलेचो सोद घेवन तिचो जबाब नोंद केला. व्हिडिओंत दिसपी हेर दुबावितांचो सोद पुलीस घेतात. ही पुराय कारवाय पुलीस अधीक्षक जीवबा दळवी, पुलीस निरीक्षक तुषार लोटलीकार आनी उपनिरीक्षक अमीन नायक हांच्या पंगडान येसस्वीपणान केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
