भांगरभूंय | प्रतिनिधी
पणजी : आदीं येरादारीचीं हेर साधनां नाशिल्लीं. त्या काळार राजा- महाराजा, शिपाय घोड्यांचेर बसून वा रथांतल्यान प्रवास करताले. झुजा वेळारूय घोडे, हती आनी रथांचो वापर करताले. जसो काळ बदल्लो, तशीं हीं सगलीं साधनां पयस जालीं आनी वाहनांतल्यान प्रवास सुरू जालो. आतां कोणूय घोडो चलयतना दिसल्यार वा तत्सम साधनांचो वापर करतना दिसल्यार तें एक अजापूच थारता.
कांय फावटीं आडमेळींय मुखार येतात. गोंयच्या रस्त्याचेर घोडो चलोवपी एका तरणाट्याचेर दिवचल पुलीस स्टेशनांत कागाळ दाखल जाल्या. कागाळी उपरांत तो घोडो घेवनूच दिवचले पुलीस स्टेशनाचेर पावलो. थंय ताणें गरजेची प्रक्रिया पुराय केली आनी उपरांत घोड्याचेरूच बसून थंयच्यान गेलो. कनिश्क पेडणेंकार अशें त्या तरणाट्याचें नांव.
कनिश्क रस्त्यार घोडो चलयतनाचो व्हिडियो फाटीं बरोच व्हायरल जाल्लो. उपरांत ताणें दुसरो व्हिडियो काडून घोडो चलोवप आनी तो पोसप हे विशीं म्हायती दिली.
ताणें व्हिडियोत म्हणलां, घोडो पोसप तितलें सोपें नासता. हाका बरोच खर्च येता. जनावरां मोगींक दिसता, आमी ताची काळजी घेनात. मात ताची कितली काळजी घेवप जाता आनी ताच्या जेवणा, खाणाचेर कितलो खर्च येता तें आमकांच खबर. हे विशीं तांणी व्हिडियोंत म्हायती दिल्या.
सध्या कनिश्क हाचें रस्त्यार घोडो चलोवप गोंयभर चर्चेचो विशय जावन पडलां. ३५ ते ४० वर्सां पयलींय दिवचलच्याच एका छत्रपती शिवाजी महाराज मोगीन घोडो पोशिल्लो. तोय तसोच लोकप्रीय जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
