संसदेचें खाशेलें अधिवेशन: बायलांच्या आरक्षणा खातीर आयज ३ विधेयकां मांडटले
भांगरभूंय | प्रतिनिधी
नवी दिल्ली: संसदेंत आयज बायलांच्या आरक्षणा संबंदीत तीन म्हत्वाचीं दुरुस्ती विधेयकां मांडटले. ह्या विधेयकां प्रमाण, लोकसभा आनी राज्य विधानसभेंत बायलांक २०२९ सावन ३३ टक्के आरक्षण दिवपाचो प्रस्ताव आसा. हे खातीर तीन दिसांचें खाशेलें अधिवेशन आपयलां.
म्हत्वाचे मुद्दे
जाग्यांचो आंकडो वाडटलो: दुरुस्ती विधेयकांत लोकसभेच्या खासदारांचो आंकडो सध्याच्या ५४३ वयल्यान ८५० करपाचो प्रस्ताव आसा. राज्यांनी ८१५ आनी केंद्रशासीत प्रदेशांनी ३५ मेरेन सुवातो आसतल्यो.
- मतदारसंघ पुनर्रचना सुवातांचो नेमको आंकडो थारावपा खातीर मतदारसंघांची पुनर्रचना करतले. हातूंतल्यो २७३ सुवातो बायलां खातीर आरक्षीत आसतल्यो.
- चर्चा आनी चडश्या ह्या विधेयकांचेर आयज १६ सावन चर्चा सुरू जाल्या. ती १८ एप्रील मेरेन चलतली. हें विधेयक मंजूर जावपाक सरकाराक दोन तृतीयांश बहुमताची गरज आसा. भाजप आनी कॉंग्रेस सयत सगळ्या पक्षांनी आपल्या खासदारांक हजर रावपा खातीर ’व्हिप’ (आदेश) जारी केला.
- अंमलबजावणी: संसदेची मान्यताय मेळ्ळ्यार हो कायदो ३१ मार्च २०२९ सावन लागू जातलो आनी त्याच वर्सा जावपी लोकसभा वेंचणुकेंत तो पयले फावट प्रभावी थरतलो.
विरोधाचो सूर आनी गदारोळ:
विरोधक मतदारसंघांचे पुनर्रचनेक विरोध करतात, देखून सभागृहांत गदारोळ जावपाची शक्यताय आसा.
चर्चेचो वेळ:
- लोकसभा: १८ वरां चर्चा.
- राज्यसभा: १० वरां चर्चा.
कायदो मंत्री अर्जुन राम मेघवाल आनी केंद्रीय गृहमंत्री अमित शाह हीं विधेयकां सादर करतले. प्रधानमंत्री नरेंद्र मोदी फाल्यां चर्चेंत आपलें म्हणणें मांडूंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
