भांगरभूंय | प्रतिनिधी
पणजी : राज्यांत स्मार्ट वीज मीटर बसोवचे पयलीं खात्यान तशेंच हांवें स्वता लेगीत ताचो खोलायेन अभ्यास केला. स्मार्ट मिटराक लागून जनतेचोच फायदो जातलो. आमी केंद्र सरकार, जेईआरसीच्या नेमां प्रमाणूच स्मार्ट मिटर बसयतात. हाका लागून ह्या विशयाचेर आतां कसलेच तरेची चर्चा जावची ना. मिटर बसयले उपरांत ताचो निकाल बरोच येतलो अशी आमची खात्री आसा. उपरांत आमी हे विशीं चर्चा करपाक शकता, अशें प्रतिपादन वीज मंत्री सुदिन ढवळीकार हांणी केलें. ते बिरेस्तारा अखील भारतीय थळावे प्रशासन संस्थेचे कार्यावळी उपरांत माध्यमां कडेन उलयताले.
आधुनीक गजाली लागू करपाक गोंय देशांत मुखार आसा. गोंयचे जनतेक आजूनय स्मार्ट मिटराचे फायदे खबर ना. स्मार्ट मिटराक लागून गिरायकांक आपल्याक खंयच्या उपकरणाक लागून बील चड आयलां हें समजतलें. घरांतलीं लायटीचीं उपकरणां चुकून सुरू उरल्यार हेर सुवातांचेर वचून मोबायला वरवींय वीज बंद करतले. ही प्रणाली प्रीपेड आशिल्ल्यान गिरायकांक हाचो फायदो जातलो.
ताचे पयलीं जाल्ले कार्यावळींत तांणी देशभरचे थळावे नागरीक संस्थेच्या महापौर, नगरसेवकां कडेन उलोवप केलें. ढवळीकार हांणी मुखार म्हणलें, अखिल भारतीय थळावी प्रशासन संस्था ही राज्य आनी केंद्र सरकारा मदलो दुंवो. नव्याच नियुक्त केल्ल्या नगरसेवकां खातीर मार्गदर्शन करपाचें काम संस्था करता. विकसीत भारताचे सपन पुराय करपा खातीर दरेक लोक प्रतिनिधीन उमेदीन काम करचें. थळाव्या स्वराज्य संस्थांनी नागरीक केंद्रीत कामांक प्राधान्य दिवचें. तांणी शाश्वत उदरगतीचीं कामां करचीं. बरें प्रशासन दिवप ही आमची सगल्यांची जापसालदारी आसा.
फोंडें पोट वेंचणुकेचें प्रकरण सध्या सर्वोच्च न्यायालयांत आशिल्ल्यान हे विशीं हांव कसलीच प्रतिक्रिया दिवचो ना. विधानसभा अधिवेशना विशीं कॅबिनेट योग्य तो निर्णय घेतले. कॅबिनेटांत निमाणो निर्णय घेवपाचो अधिकार फकत मुख्यमंत्र्यांक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
