भांगरभूंय | प्रतिनिधी
पणजीः राज्यांत शाळा- खेळां कन्सेप्ट आमी राबोवपाचो विचार चलयला. ह्या उपक्रमा वरवीं विद्यार्थ्यांक तीन वरां खातीर प्रशीक्षण दिवपाचो प्रस्ताव आसा. जाका लागून १०० टक्के तांची कुशळटाय उदरगत जातली, अशें खेळां मंत्री रमेश तवडकार हांणी सांगलें.
हालींच खेलो इंडिया खाला छत्तीसगडाक आदीवासी खेळाचें आयोजन जाल्ले. ह्या खेळांत वाटेकार जाल्ले जैतीवंत खेळगड्यांचो तवडकार हस्तुकी भौवमान जालो. ह्या वेळार खेळा संचालक अजय गावडे आनी हेर अधिकारी हजर आशिल्ले.
खेळगड्यांक संबोधित करतना तवडकार हांणी सांगलें, भारत सरकारान प्रधानमंत्री नरेंद्र मोदी हांचे मार्गदर्शना सकयल खेलो इंडीया अंतर्गत पयलेच खेपे आदिवासी खेळ घडोवन हाडपाचो यत्न केलो. ह्या खेळाक व्हड येस आयलां.
राज्यातल्या खेडे वाठारांत आदिवासी खेळगड्यांकडेन जल्मजात प्रतिभा आसा. नेत्रावळी सारकिल्ले खेड्या गांवांतलो बाबू गांवकार हाचो नॅशनल गेम्सांत फामाद जावन दरेकी खेळांनी ताचो आस्पाव आसता. ही छुपी प्रतिभा विकसीत करपाचो आमचो यत्न आसा. जर वर्साचे ३६५ दिस, सुटयेचे दिस सोडल्यार आमी भुरग्यांक प्रशिक्षित केल्यार आमी चड मॅडला जिखपाक शकतात, अशें मत तवडकार हांणी सांगलें.
हे खातीर आमकां आतां सावनच तयारी करप सुरू करपाक जाय. जी इंडोर सुविधा आसा ती वाडोवपाक जाय. हे खाती आमी शाळा-खेळ ही संकल्पना राबोवपाचो विचार चलयला. सकाळीं देड वर आनी सांजे देड वर अशे दिसाक तीन वरां विद्यार्थ्यांक प्रशिक्षण दिल्यार तांचे कुशळटायेचो १०० टक्के योग्य वापर जावपाक शकता. आदिवासी खेळगडे विकसती करतले जाल्यार शार सोडून आमकां गांवांगांवांनी प्रशिक्षण दिवचें पडटलें, अशी म्हायती तवडकार हांणी दिली.
आदिवासी खेळां वेळार आमी छत्तीसगडचे मुख्यमंत्री विष्णू देसाय हांचे वांगडा खेळां आनी कला क्षेत्रात कबलात करपा विशीं चर्चा जाली. खेळा आनी संस्कृतीेची अदलाबदल करपाचे प्रस्ताव तांचेनी मानून घेतले. अशेच जर आनीक तीन-चार राज्यां वांगड्या कबलाती जाल्यार खुपश्यो खेळा कार्यावळी जावन खेळां प्रतिभांक उर्बा मेळटली, अशें तवडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
