भांगरभूंय | प्रतिनिधी
वास्को: तानेल्लीं हेडगीं गोरवां, रस्ताद सुणीं तशेंच वेगळ्यावेगळ्या सुकण्यांक गिमाच्या दिसांनी उदक मेळचें हे खातीर कांय सुवातांनी दवरिल्लीं सिमेंटाचीं आयदनां आतां जळारांचीं केंद्रां जावपाचीं भिरांत उक्तायतात. ह्या प्रकरणांत वास्को भलायकी केंद्रा वतीन मुरगांव पालिकेक म्हायती दिल्या. त्या आयदनांनी पावसाच्या दिसांनी उदक सांठून उरचें न्हय हे खातीर जतनायेची उपाय येवजण हातांत घेवची अशी विनंती केल्या.
स्वातंत्र्य पथ तशेंच हेर सुवातांनी तानेल्लीं हेडगीं गोरवां, रस्ताद सुणीं, वेगळ्यावेगळ्या सुकण्यांक गिमाच्या दिसांनी आनी हेर दिसांनी उदक मेळचें ह्या हेतान सिमेंटाची आयदनां दवरल्यांत. हीं आयदनां सिमेंट काँक्रिटान फुटपाथार घट्ट बसयल्यात. ताका लागून ती कोणेय उबारून व्हरपाची भिरांत ना.
पयलीं हेडगीं गोरवां ह्या आयदनांतलें उदक पितालीं. पूण गोरवांक धरून तांची गोशाळेंत वेवस्था केल्ल्यान सद्या शार वाठारांत हेडगीं गोरवां नदरेक पडनात.
त्या आयदनांनी एकठांय जाल्लें उदक नेमान बदलत नाशिल्ल्यान कांय आयदनांनी जळारांच्यो आळ्यो तयार जाल्यात. पावसाच्या दिसांनी डेंग्यू, मलेरिया बी सारकीं दुयेंसां जावचीं न्हय हे खातीर वास्को भलायकी केंद्रान जतनायेची उपाय येवजण सुरू केल्या. रितीं टाकावू आयदनां, नाल्ल्याच्यो कट्ट्यो, टायर, टीन बी हांचो विलो लायतात.
मजगतीं फुटपाथार आशिल्ल्या सिमेंटाच्या आयदना संबंदी प्रस्न उप्रासला. ह्या आयदनां संबंदी योग्य जतनाय घेतली ना जाल्यार तीं आयदनां जळारांचीं केंद्रां जावपाचीं भिरांत उक्तायतात. त्या आयदनांनी पावसाच्या दिसांनी उदक एकठांय जावचें न्हय हे खातीर रेंव घालची वा त्या आयदनां भोंवतणी प्लास्टीक गुठलावपाची गरज आसा. ह्या प्रकरणांत मुरगांव पालिकेन गंभीर दखल घेवन पावलां उबारपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
