आरक्षणा बगर बदल हाडटली अस्तुरी

भांगरभूंय | प्रतिनिधी

स्त्रीशक्त सरकारांत आसल्यार लाव जाता हें तांकांच न्हय प्रधानमंत्री नरेंद्र मोदी हांकांय होलमलां. संसदेंत नारीशक्ती वंदना विधेयकाक 2023 वर्सा मान्यताय दिल्या, कायदोय जाला. गरज आसा कायदो चालीक लावपाची.

गोंय विधानसभा वेंचणूक लागीं येतना अस्तुरेक व्हडा प्रमाणांत विधानसभेंत धाडपाची संद राजकी पक्षांक आसा. आरक्षणा बगर बारा बायलो विधानसभेर धाडपी गोंय पयलें राज्य जावंक शकता असो संदेश मुख्यमंत्री डॉ. प्रमोद सावंत हांणी धाडला.
स्त्रीशक्त सरकारांत आसल्यार लाव जाता हें तांकांच न्हय प्रधानमंत्री नरेंद्र मोदी हांकांय होलमलां. संसदेंत नारीशक्ती वंदना विधेयकाक 2023 वर्सा मान्यताय दिल्या, कायदोय जाला. गरज आसा कायदो चालीक लावपाची. नारीशक्ती कायदो चालीक लावपाक हाडिल्लें विधेयक समजलेंना. संविधानांतलें मतदारसंघ फेररचना कलम, समानता तत्व समजून घेतल्यार विधेयकाक मान्यताय मेळटली आशिल्ली. एकेवटेन 2029 वर्साच बायलांक आरक्षण मेळपाकच जाय अशें सांगप, विधेयकाक विरोध अशें म्हणप आनी दुसरे वटेन विधेयकाक मान्यताय मेळची न्हय हेखातीर मतदान करप हें कसलें लक्षण? देशांतली स्त्रीशक्तीच विरोधकांक जाप दितली अशी आस्त बाळगुया.
गोंय विधानसभेंत 2027 वर्सा 33 टक्क्यांनी अस्तुरेक उमेदवारी दिवपाची तयारी प्रदेश भाजपान केल्या. मुख्यमंत्र्यांच्या उलोवपांतल्यान तसो संदेश गोंयचे स्त्रीशक्तीक पावला. दोन वर्सां आदीं चवथीक मुख्यमंत्र्यांच्या मतदारसंघांत चवथीचीं परबीं दिवपी एक जायरात दिशिल्ली. मुख्यमंत्र्यां वांगडा तांची घरकान्न सुलक्षणाचो फोटो जायरातींत आशिल्लो. मुख्यमंत्र्यांची घरकान्न विधानसभा, लोकसभेंत वतली असो संदेश मोन्यांनी धाडपी ती जायरात. धुवेक उंचेल्या शिक्षणाचो मार्ग दाखोवन आपली घरकान्न राजकारणाच्या मुखेल ल्हारांनी येता हें मुख्यमंत्र्यांनी कळीत केलां. घरच्यो गृहमंत्री, धुवे, पुता पासत वरिश्ठ राजकारण्यांनी आपले मतदारसंघ सोडचे. 12 बायलां गोंय विधानसभेंत धाडपाचो होच वगत.
कित्याक दिसलां मुख्यमंत्र्यांक आपले घरकान्नीक राजकारणाच्या मुखेल ल्हारांनी हाडपाचें? ते शिकिल्ले, नारीशक्तीक मान दिवपी समाजांतले. तांची घरकान्न निर्णयक्षम आसा शिक्षणान, अर्थकारणान. आयजवेर तिणे आपल्याक बळगें दिलें आतां तिची गोंयच्या राजकारणाक गरज आसा हें मुख्यमंत्र्यांक होलमलां. सुलक्षणाताई उंचेलें शिक्षण घेतिल्ल्यो प्राध्यापक, अभ्यास करपी संवेदनशील अस्तुरी. आदले मुख्यमंत्री मनोहर पर्रीकार हांणी तांकां प्रदेश भाजपाच्या राजकारणांत हाडिल्लें. वेगवेगळ्या मतदारसंघांनी वेंचणुकां पासत त्यो भोंवल्यात, अडचणी वेळार मुखेलमंत्र्यांचो त्योच आदार. एक बायल तीय घरकान्न वांगडा आसल्यार तो समाजकारण, राजकारणांतल्या वायटा पासून पयस उरता. घरकान्नीक बराबरीन व्हरता तो जैतवंत जाता हें सत.
लागीं लागीं 14 वर्सां गोंयांत भाजपा सरकार सत्तेर आसा. भाजपान गोंयांक राजकी थिराय दिल्या. राज्याक उदरगतीच्या मार्गार व्हरपाक राजकी थिराय म्हत्वाची आसता. जाल्ले उदरगतीचो लाव गोंयां बराबरीन देशाक मेळ्ळा. देशांतले गोंयचे उद्येगपती नवी दिका आपल्या भुरग्यांक दाखयतात. रोजगार निर्मणेत तांचो वांटो आसा. उद्येगपती वेंचणुके तेंपार राजकारण्यांक मजत करतात, राज्यसभेर पावल्यात. राजकारणी जेन्ना उद्येगपती जातात तेन्ना परंपरेतल्या उद्येगपतींक विधानसभा, लोकसभेर वच्चें दिसल्यार अजाप न्हय. नारीशक्ती तातूंत आसपावता. गोंयच्या
पर्यटनाक नवे वाटेन व्हरपाचो वावर जाता तेन्ना अस्तुरी व्हडा संख्येन विधानसभेंत आसप गरजेचें.
नारीशक्ती आरक्षण कायदो चालीक लावपाक बरीच वर्सां जावंक नाशिल्ली मतदारसंघ फेररचणूक करपाचो मार्ग आडावला. देसाची लोकसंख्या उणे दरेन वाडटा, उदरगतय व्हडा प्रमाणात जाल्या, कायदेय जाल्यात. गरज आसा उदरगतीचो नियाळ करपाची, केल्ले कायदे बेगीन चालीक लागपाची. लोकसंख्येच्या प्रमाणांत खासदार, आमदार नाशिल्ल्यान गांवगीरे वांठार काळखांत आसात.
गोंयच्या चडशा मतदारसंघांनी अस्तुरी मतदारसंख्येन चड आसा. शिकिल्ली, अर्थिक नदरेनय बळिश्ट. गोंयान शशिकलाताई काकोडकार हांचेवरी देशांतली एक मुख्यमंत्री दिली. त्याच राज्याक परतून अस्तुरी मुख्यमंत्री मेळपाक जाय. सरकारांत स्त्रीशक्ती आसा, राजकारणांत मुखार वचपाची तांक तांचे मदीं आसा. धर्म, जात, समाजाची सांखळ गोंयचे कोनशे समजून घेतल्यार 2027 त 12 बायलो विधानसभेंत पावतल्यो. फोंडें पोटवेंचणुकेंच्या प्रचारावेळार सरकार आनीक मंत्री दितले अशें उतर मुख्यमंत्र्यांनी दिल्लें. मंत्रीमंडळांत एके अस्तुरेक आसपावन उतराक पाळो ताणी दिवन भुजांवयलें वजें उणें करचें. भाजपाचें 2027 त 27 चें सपन पुराय थंयच जावंक शकता.
एक नारीशक्ती गोंयचें राजकारणच न्हय समाजकारणय बदलूंक शकता. राजकारणांतली बारीकसाण तिका कळ्ळ्या भलायकी सांबाळून, तंत्रज्ञानावरवी प्रशासनाक दिका दिवपाची तांक तिका आसा. फुडारांत तिचे खातीर उमेदवारी मेळोवपाक “विनेबिलीटी ” चें अग्नीदिव्य आसतलेंच, अस्तुरी विरुद्ध अस्तुरी झूज जातलें. ती उंचेल्या पावंड्यार वतना तिका फाटीं ओडपय जातलें, अशावेळार बराबरीची सुवात तिका घरांतल्यान दिवपाक आरंभ केल्यार राजकारणांत पयस ना. देशाचे पयले कायदोमंत्री, संविधानाचे आर्किटेक्ट डॉ. भीमराव आंबेडकार, महात्मा ज्योतीबा फुले हांच्या वावरांत स्त्रीशक्ती आशिल्ली. कालची ती आयज दिसची ही अपेक्षा नाका. कालचे परस ती आयज बळिश्ट जाल्या, संवसार जिखपाची तांक शिक्षणान तिका मेळ्ळ्या. उसरां कांय जायना ती आठ न्हय शंभर तासांची हें ताका कळ्ळां. तिचे पासत राजकारणाचीं उंचेली सोंपणा मेकळीं करतना तो आपली वाट रुंद करुंक सोदता. कितें करप त्या वगतार?
याद करुया समानतेची, “रमा” न्हय रमाबाय, सावित्री आनी अहिल्येची, झांशीची राणी लक्ष्मीबाई, पद्मिनीची.
झूज आनी शांतीकायेच्या वगतार ती दिसता. तिची अस्मिताय होलमल्ल्यांक तिणें एकवटान सलाम करुंक, झुजपाक शिकचें ताचे बराबरीन.
प्रधानमंत्री नरेंद्र मोदी हांकां नारीशक्तीचें म्हत्व तांचे आवयन ह्या संवसाराचो निरोप घेतलो तेन्ना कळ्ळां आसतलें. 7५ वर्सांचे पिरायेचे प्रधानमंत्री देशाच्या स्वातंत्र्याबराबरीन जल्मल्ले. प्रधानमंत्रीांक संवसारांतली राजकारणांत मुखार सरपी स्त्रीशक्ती दिसल्या. भारत संवसाराची म्हासत्ता जाता तेन्ना भारतीय स्त्रीशक्ती राजकारणात फाटल्यान उरल्या हें तांकां होल्मल्ल्यान कायदो जाला. मतदारसंघ फेररचणूक विधेयकाक मान्यताय आयज मेळ्ळीना तरी फुडल्या स म्हयन्यात ती मेळूंक शकता. केंद्रीय मंत्रीमंडळ विस्तार जावपाची चिन्ना खासदार नितीशकुमार राज्यसभेत पाविल्ल्यान दिसूंक लागल्यांत. गोंयचे खासदार सदानंद तानावडे हांचो मंत्रिमंडळांत आसपाव जावचो हे खातीर येत्न जाय.
आरक्षणाची वाट म्हेळी आयजय आसली तरी, राजकारण नितळ करपाक तिका झुजचें पडटलें. सुरवेक आरक्षणाबगर, आरक्षण मेळटकीच आरक्षणातल्यान. फुडारांत आरक्षण उणें जातलें हें. प्रधानमंत्रीांक कळ्ळें तें विरोधी राजकारण्यांक केन्ना कळटलें ?

सुहासिनी प्रभुगांवकार
9881099260