भांगरभूंय | प्रतिनिधी
नात्यांतल्या मनशांचें मरण पळोवपाचें व्हड दुख्ख, नीळकंठ शंकरा भशेन तिणें पिवन पचयलें आनी खंबीरपणान ही बायलमनीस उबी रावली.
मन क्यो बहका रे बहका आधी रात को, बेला महका रे महका, आधी रात को… हे “उत्सव” सिनेमांतलें गीत 1997 वर्सांत घरांतल्या स्टिरीओ टेप रेकॉर्डराचेर रिव्हायंड मारून आयकतना सहज कॅसेट कव्हर पळयलें आनी लता मंगेशकर ह्या नांवा कुशीक आशा भोसले हें कोणतरी अनवळखी गायिकेचें नांव म्हाका अजाप करून गेल्लें. ल्हान आसतना लता मंगेशकर हांकां टिव्हीचेर आनी घरांतल्या ऑडिओ कॅसेटींच्या कव्हरांचेर पळयल्ले कारणान ही पिरायेन व्हडली गायिका वळखीची आशिल्ली, पूण आशा भोसले कोण? असो पडिल्लो प्रस्न, फुडेंफुडें तांचीं गीतां ऑडिओ प्लेयराचेर आयकतना आनी चित्रहार, छायागीत सारकिल्ले कार्यक्रमांनी तांची गीतां पळयतना आनी स्टेज शोज हांचें थेट प्रक्षेपण दूरदर्शन वाहिन्यांचेर पळयतना सुटत गेलो. 1998- 99 वर्सांत माध्यमिक शाळेंत वचपी म्हज्या सारकिल्ल्या भूरग्याक 2005 मेरेन उच्च माध्यमीक म्हाविद्यालयांत फिल्मी गीतां म्हणपी भुरग्यांक पळोवपी “कॉलेज बॉय” जाल्ल्या तरणाट्याक आपूण “आशा भोसले ” नांवाचें एक दंतकथा जाल्ल्या वा ” लिजेंड” जाल्ले बायलेक आयकता हाचो साक्षात्कार जालो.
हे सोंपलेल्या सप्तकांत आशाताई भोसले संवसाराक अंतरल्यो. पूण आमचे फाटले दोन पिळग्यो, आमचे आनी फुडाराक येवपी पिळगेक लागून दवरून गेली ती विंगड विंगड भारतीय भाशां मदली आध्यात्मीक, सिनेमा, भावगीत, भक्तीगीत, बॉलिवूड, पॉप, रोमँटिक, विरह, सुख, दुख, शास्त्रीय, नीमशास्त्रीय अशे तरेतरेच्या गीतांचे गिरेस्त दायज दवरून. तांचेर लेख बरयतना, चर्चा करतना वा बातम्यांचे फीचर करतना एखादे सिनेमा संगीत मोगी, संगीत तज्ञ वा गायक आनी एखादे सिनेपत्रकाराक “कितें धरचे, कितें सोडचे” असो गोंदळ निर्माण जावपाक फावता. कारण दरेका प्रकारांतली जायतीं गीतां तितकीच अभिजात दर्जाची “क्लासिक ” श्रेणींतली आनी तितकीच लोकप्रिय वा फामाद जाल्यांत.
एक बॉलिवूड संगीत मोगी आनी कानसेन म्हूण म्हाका तुमी विचारलें जाल्यार हांवें ल्हानपणान दूरदर्शनाचेर पळयिल्ल्यो 1970, 1980 आनी 1990 चे दसकांतल्यो हिंदी सिनेमांतल्यो नायिका आनी तांचे फाटल्यान लिपिल्लो आशाताईंचो आवाज एका स्वर्गीय, जादुई आनी तंद्री लावपी गीतांचो मंत्रमुग्ध करपी काळाच्यो यादी ताज्यो करून वता. मागीर ती गांजाचो कश मारून दुख विसरपाक सांगपी “दम मारो दम” गीतातली झीनत अमान आसू, “ये मेरा दिल प्यार का दिवाना” अशें म्हणून आदलो डॉन म्हटल्यार अमिताभ बच्चन हांकां आपले सुंदरतेची भुरळ घालून आपले फास्केंत आडकावन पुलिसां कडेन दिवपाचो यत्न करपी मादक सौंदर्याची हेलेन आसूं, “चुरा लिया है तुमने जो दिलको ” म्हणून यादोंकी बारात फिल्मातलो सहनायक विजय अरोडा हांचेर मोग उक्तावपी झीनत अमान आसूं, “तू, तू है वही दिल ने जिसे अपना कहा ” अशे नायक ऋषी कपूर हांकां उद्देशून म्हणपी नायिका पूनम ढिल्लो वा टीना मुनिम अंबानी आसू, ” मागे उभा मंगेश पुढे उभा मंगेश, माझ्याकडे देव माझा पाहतो आहे ” म्हणून आपल्या कुलदेवतेची स्तुती करपी ” महानंदा ” तली रंजना देशमुख आनी शशिकला जवळकार सेहगल आसू, तांचे सगल्यांचो आवाज आशाताईंचो आसा, हे कळपाक म्हाका प्राथमिक शाळेचो विद्यार्थी ते अकरावेक शिकपी कॉलेजकुमार आनी ह्या इतल्या वर्सांनी घेतिल्लो बॉलिवूड संगीताचो आस्वाद अशी व्हड काळाची आराधना करची पडली. आशा भोसले हे गायिकेची गीतां आयकप हो एक स्वर्गीय सुखाचो अणभव आसतालो. लता मंगेशकर सारकिल्ले व्हड म्हारुखाचे संपर्कांत रावूनय बी तांणी स्वताचे आपले व्यक्तीमत्व, गायकीतली स्वताची शैली आनी अष्टपैलू गायिकेची वळख निर्माण करपाक ती सशक्त आनी जैतिवंत थारली.
पंचमदा आनी ओ. पी. नय्यर सारकिल्ले दिग्गज संगीतकार ताईंचे संपर्कात आयले उपरांत तांका जो “परीसस्पर्श” जालो, तातूंतल्यान तांणी गायिका म्हूण जी अश्टताशी गायकीची प्रतिमा उबी केली, तेका तोड ना आनी तो सगलो एक फामाद इतिहास आसा. पंचमदा तांचे जीवितांत फकत एक संगीतकार म्हणूनच न्हय तर फुडें एक घोव, घरकार वा सुख दुःखात साथ दिवपी जिविताचे जोडीदार म्हूण आयले आनी आशा हांका तांचो मोग आनी आदार मेळो , जो खयच्याय जैतीवंत आनी कर्तबगार बायलेक मेळप, हो तिचो हक्क आसता. तांचे जिणेंत चड उतार आयले. नात्यांतल्या मनशांचें मरण पळोवपाचें व्हड दुख्ख, नीळकंठ शंकरा भशेन तिणें पिवन पचयलें आनी खंबीरपणान ही बायलमनीस उबी रावली.
तिचे वैयक्तीक जिणेंत एक चाहतो म्हूण भितर खोलायेन पळोवपाची म्हजी इत्सा ना, कारण हो लेख एक म्हान गायिका, कलावंत म्हुण तशेच खाणा जेवणाची भोक्ती म्हूण ताईक “सॅलिब्रेट” करपाचो उद्देश आसा. तिचे हातचे जेवण, तरेतरेचे खाद्यपदार्थ हांची चव घेतिल्ले तिचे कलाकार इश्ट, नात्यातले लोक हे खरेच नशीबवान थारले. हीच आवड फुडें वेवसाय जाली आनी परिणाम म्हूण वेगवेगळ्या राज्यांनी तशेंच विदेशांत “आशाज रेस्टॉरंट” म्हूण हॉटेलांची माळ उबी जावपाक कारण थारली. आशा भोसले हाणी समाजाक लागून कितें केलें? असो प्रस्न करपी काय द्वेश वाडोवपी तत्वां आतां तिचे मरणां उपरांतचो गौरव पळोवन अळंब्यो कश्यो वयर सरल्यात. ताका अर्थ ना. दर एका कलावंतान हातात फलक घेवन सरकार आनी हेर गजालीचेर शबय घालीत रस्त्याचेर येवन फुकटचो शिगमो करपाची गरज आसना. तांचे समाजकार्य व्हडले भयणी इतलेंच व्हड आसा. टीकाकारांनी मात्शें हातात आयिल्ले मोबायल हें खेळणें वापरून इंटरनेट, विकिपीडिया आनी युट्यूब उगडून पळोवचे. सगली म्हायती मेळटा.
समारोप करतना एक गीत याद करपाक गेलो काय डझनवारी गीता याद जातात. “दो लफ्जो की है दिल की कहानी”, ” पिया तू अब तो आजा”, “जवानी जानेमन हसीन दिलरुबा”, “रात बाकी बात बाकी होना है जो..” “चान्न्याचे राती, माडाच्या सावळेंत….” , “साद तुगेलो आयकूक आयलो करचे कितें कळेना..”, “जांभूळ पिकल्या झाडाखाली ढोल कुणाचा वाज जी..”, “केव्हा तरी पहाटे उलटून रात्र गेली..”, “मलमली तारूण्य माझे..” अशी कितलीशिच गीतां याद जावपाक लागतात. तांचे भावगीत, भक्तिगीत हांचेर वेगळो स्वतंत्र लेखच बरोवचो पडटलो इतकी “व्हरायटी” दिवपी ही भारतीय सिनेमा आनी संगीत उद्देगातली प्रतिभावंत आनी “व्हर्सेटायल” गायिका थारली, हातूंत मात्तूय दुबाव ना. पूण एक 90 च्या दसकांत वाडिल्लो भुरगो म्हुण तांचे ते दसकात आयिल्ले “जानम समजा करो”( 1997 ) हें अल्बमातले गीत जे आमका आयजय बी भुरळ घालता ताचो उल्लेख करून सांगता करता. मजरूह सुलतानपुरी हांणी बरयल्ल्या ह्या गीतांत आशा ताईंच्या आवाजात गीतांतली नायिका म्होवाळ आवाजांत आपलो मोग आशिल्ल्या मनशांक रातीचे वेळार रोमँटिक इशारे दिवन कितेंतरी सांगपाचो यत्न करता. आशाताईंक तांच्याच गीतावरवीं हीं आर्गा,
“रात शबनमी, भीगी चांदनी… तिसरा कोई दूर तक नहीं
इसके आगे हम, और क्या कहे, जानम समजा करो..”
सनतकुमार फडते
7020438469
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
