भांगरभूंय | प्रतिनिधी
येरादारी बंद करपाची इराणान आदींच केल्ली घोशणा
वॉशिंग्टन : स्ट्रेट ऑफ हॉर्मुजांतल्यान वचपाचो यत्न करपी दोन बोटींचेर इराणी गनबोटींनी फारपेट केलो. इराणान ह्या म्हत्वाच्या दर्या मार्गाचेर परतून खर नियंत्रण लागू करपाची घोशणा केले उपरांत रोखडीच ही घडणूक घडली.
यूके मेरिटायम ट्रेड ऑपरेशन्स केंद्राचे म्हायती प्रमाण, एका टँकराच्या कप्तानान कळयलें, इराणाच्या रिव्होल्युशनरी गार्डाच्या दोन गनबोटी तांचे बोटी लागसार आयल्यात आनी कसलीच रेडियो शिटकावणी दितनासतना, तांणी थेट टँकराचेर फारपेट सुरू केलो. हाचो परिणाम म्हणल्यार, त्यो बोटी होर्मुजांतल्यान आपलो प्रवास पुराय करिनासतनाच परतून फाटीं सरल्यो.
इराणान हाचे आदींच होर्मुजा वयली आपली सैन्य देखरेख खर करपाची घोशणा केल्ली. तेहरानान म्हणलां, अमेरिकेन झुजबंदी करार मोडिल्ल्यान, होर्मुजाच्या मार्गांतल्यान वचपी सगली दर्या येरादारी हाचे मुखार सैन्याच्या नियंत्रणा खाला दवरतले.
मजगतीं, अमेरिकेन स्ट्रेट ऑफ होर्मुजा वयली आपली नाकेबंदी काडपाक न्हयकार दिलो. राष्ट्राध्यक्ष डोनाल्ड ट्रम्प हांणी घोशणा केली, जे मेरेन इराण अमेरिके कडेन करार करिना, ते मेरेन ही नाकेबंदी लागू उरतली.
ते भायर, अमेरिकेच्या सेंट्रल कमांडान सोशल मिडियाचेर पोस्ट करून म्हणलां, इराणाच्या बंदरा वयल्या आनी दर्यादेगे वयल्या वाठाराचेर नौदळ नाकेबंदी सेगीत चालू आसतली. ही नाकेबंदी कायम दवरचे खातीर, अमेरिकेची झुजाबोट ‘यूएसएस कॅनबेरा’ सध्या अरबी दर्यांत गस्त घालता. च्रम्प हांणी अशेंय ठामपणान सांगलें, अमेरिका खंयचेय परिस्थितींत इराणा कडेन आशिल्लो समृद्ध युरेनियमाचो सांठो जप्त करतली. तांणी शिटकावणी दिल्या, जर राजनैतीक वाटाघाटींतल्यान उपाय आयलो ना जाल्यार, ही मोख आनीक जबरदस्तीच्या मार्गान मेळयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
