भांगरभूंय | प्रतिनिधी
पणजी : गोंय पुस्तक महोत्सवाच्या दुसऱ्या दिसा साहित्यीक सहभाभागाक खास म्हत्व दिलें. विवीध सत्रांतल्यान लेखक, उलोवपी, अभ्यासक आनी वाचक एकठांय आयले. ह्या चर्चांक लागून प्रेक्षकांक आयकुपाची, विचार करपाची आनी पुस्तकांचे पलतडीच्या कल्पनां कडेन जोडपाची संद मेळ्ळी.
गोंयचे राज्यपाल पुसापती अशोक गजपती राजू हांणी महोत्सवाक भेट दिली. तांणी पुस्तक प्रदर्शन पळयलें आनी सगल्या पिरायेच्या वाचकां कडेन आनी प्रकाशकां कडेन संवाद सादलो. उपरांत तांणी बाल विभागांत वेळ सारोवन विद्यार्थ्यां कडेन आपलेपणान चर्चा केली. विवीध शाळांतल्या गुणेस्त भुरग्यांचो भोवमन करून तांकां नॅशनल बूक ट्रस्ट, इंडिया हांणी प्रकाशीत केल्लीं पुस्तकां भेट म्हूण दिलीं.
‘सोनपरी’ ते ‘बालिका वधू’ : एक पिळगी घडोवपी कथा
सोनपरी’ ते ‘बालिका वधू’- भारतीय दूरदर्शना वयल्या लोकप्रीय पात्रांनी परतून एकदां उगडास ताजे केले. ‘फ्रॉम स्क्रीन टू पेज : अ स्टोरीटेलर्स जर्नी’ ह्या सत्रांत अभिनेत्री मृणाल कुलकर्णी आनी संजय चाकण्णे हांचे मदीं संवाद जालो.
वाचनान आपल्या आयुश्याक आनी अभिनयाक कसो आकार दिलो, हें लेखनप्रीय कुटुंबांत वाडिल्ल्या मृणाल हांणी सांगलें. ‘सोनपरी’ भुमिके विशीं सुपरहिरोंच्या काळांत परीकथा भुरग्यांक आवडटली काय ना, असो दुबाव आशिल्लो. पूण हे कार्यावळीक देशभरांत आनी विदेशांत उपाट मोग मेळ्ळो, ताची खोस तांणी ह्या वेळार उक्तायली. अजून लेगीत चाहते आपल्याक सोनवरी म्हूण वळखतात, अशेंय तांणी मुजरत सांगलें.
ते उपरांत ‘ग्रोवींग बीथ द कॅरेक्टर्स वी प्ले’ ह्या सत्रांत अभिनेत्री अविका गौर हांणी वेदांता अग्रवाल हांचे कडेन ‘आनंदी’ हे भुमिकेचो अणभव सांगलो.
ल्हान पिरायेर समजूंक नाशिल्ल्या पात्राचो खोल अर्थ काळा प्रमाण कसो कळ्ळो, हें गौर हांणी सांगलें. बालविवाहाचे बळी थारिल्ल्या संकश्टा आड खूबश्या प्रेक्षकांनी तांकां आवाज काडपाक प्रेरणा दिली, अशेंय सांगलें. कार्यावळीचें लेखन- दिग्दर्शनाचो भोवमान करतना तांणी सहकलाकार सुरेखा सिक्री हांकां आर्गां ओंपलीं.
लेखक कट्ट्याचेर चर्चा
लेखक कट्ट्याचेर ‘नॅशन फर्स्ट : अ शॅर्ड कॉन्व्हर्सेशन’ ह्या सत्रांत ज्येश्ठ पत्रकार उदय महुरकर आनी वेदांता अग्रवाल हांचे मदी चर्चा जाली. धर्मनिरपेक्षता, राष्ट्रवाद आनी समाजांतलो एकचार ह्या विशयांचेर तांणी मतां मांडलीं. सगले समाजघटक आनी धर्म एकठांय येवन भारताची उदरगत कशी करपाक मेळटली, हें ह्या सत्रांत स्पश्ट जालें.
लेखकांचो भोवमान सुवाळो
लेखकांचो भोवमान सुवाळो हे विशेश कार्यावळींत गोंयचे आदले मुख्यमंत्री दिगंबर कामत, नॅशनल बूक ट्रस्ट– इंडियाचे अध्यक्ष प्रा. मिलिंद सुधाकर मराठे आनी गोंय पुस्तक महोत्सवाचे मुख्य संरक्षक डॉ. किरण ठाकूर हांणी पुस्तकांचो प्रभाव आनी समाज घडोवपांत लेखकांचो मोलाचो वाटा सांगलो. लेखकांचो भोवमान केलो.
‘द मुव्हींग बॉडी, द स्टील मायंड’ ह्या सत्रांत शिव माथूर आनी माधवी पी. सुब्रमण्यम हांणी कुडीची हालचाल आनी मनाची शांतता हाचें म्हत्व सांगलें.
साहित्य अकादमी पुरस्कारप्राप्त पुस्तकां वयल्या सत्रांत डॉ. प्रकाश एस. परिएंकर आनी डॉ. मधु एस. जी. घोडकीरेकर हांणी साहित्य, भास आनी सांस्कृतीक उगडास हाचेर संवाद सादलो.
बाल विभागांत उमेद
बाल विभागांत सुमारे 3 हजार भुरग्यांनी कथा, नाट्य आनी सर्जनशीलतेचो आनंद घेतलो. “बब्बन हजाम” हे गितां- नाट्यात्मक कथेन भुरग्यांची मनरिजवण केली. ‘रेल, कॅमेरा, अॅक्शन! थिएटर’ हातूंत भुरग्यांनी माचयेर उमेदीन वांटो घेतलो. ‘यंग ऑथर्स लॉन्चपेड’ हातूंत तरणाट्या लेखकांनी पलो लेखन प्रवास सांगलो.
दिसाची समाप्ती दिल्लीच्या पराशरा बॅण्डाच्या संगितान जालो. प्रेक्षक सांज मेरेन नाचत आशिल्ले.
गोंय पुस्तक महोत्सव 2026 विशीं
नॅशनल बूक ट्रस्ट, इंडिया (शिक्षण मंत्रालय) हांच्या आयोजनांत, गोंय सरकार, समर्थ युवा फावंडेशन आनी लोकमान्य कल्चरल फावंडेशन हांच्या जोडपालवान हो पांच दिसांचो महोत्सव आयोजीत केला. देशभरांतले वाचक, लेखक, प्रकाशक आनी विचारवंत हांगा एकठांय येतात. 100 परस अदीक प्रकाशकांचे 250 परस चड स्टॉल महोत्सवांत आसात. तातूंत कोंकणी, मराठी, इंग्लीश आनी हेर भारतीय भाशांतलीं पुस्तकां उपलब्ध आसात.
महोत्सवांत ‘गोवा : स्टोरीज ऑफ लायट अॅण्ड डिलायट’ हें विशेश प्रदर्शन आसा, जें मारियो दी मिरांडा आनी शशी शेट्ये हांची कलाकृती दाखयता. तशेंच ‘वंदे मातरम्’च्या 150 वर्सांचो आनी सरदार वल्लभभाई पटेल हांच्या जिणें वावराचो भोवमान करपी प्रदर्शनूय मांडलां. साहित्य, कला आनी संस्कृतीचो सुंदर संगम आशिल्लो गोंय पुस्तक महोत्सव 2026 भारताच्या साहित्यीक संवसारांत मोलाची भर घालता. प्रवेश फुकट आसा आनी सगल्या पुस्तकांचेर 10 टक्के सवलत सा. महोत्सव 4 फेब्रुवारीक सुरू जाला आनी 8 फेब्रुवारी मेरेन चलतलो. महोत्सव सद्दां सकाळीं 11 ते रातच्या 8 वरां मरेन उक्तो आसा. पयले आवृत्ती सावनूच हो महोत्सव वाचन, कल्पना आनी पिळग्यांक जोडपी एक दीर्घकालीन सांस्कृतीक परंपरा उबी करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
