भांगरभूंय | प्रतिनिधी
निधी वापरपाक कार्यकारी मंडळाची स्थापना
भांगरभूंय । प्रतिनिधी
पणजी : प्रधानमंत्री खनीज क्षेत्र कल्याण येवजणे प्रमाण आतां पुराय जिल्हो खण निधी वापरपाची मेकळीक सरकाराक मेळटली. आदीं 50 टक्केच जिल्हो खण निधी वापरपाक मेळटालो. नेमांत दुरूस्ती करतना आतां पुराय निधी वापरपाची तजवीज केल्या. उत्तर आनी दक्षीण गोंय मेळून 200 कोटींचो खण निधी सरकारा कडेन आसा.
निधीचो वापर आनी देखरेखी खातीर कार्यकारी मंडळाची स्थापना केल्या. खनीज नियमन आनी उदरगत कायदो 1957 प्रमाण जिल्हो खण निधी फावंडेशनाची स्थापना जाल्ली. खण कंपन्यां कडल्यान थारावीक रक्कम खण निधी फावंडेशनांत जमा जाताली. खण कंपन्यांक थारावीक रक्कम शुल्काच्या स्वरूपांत दिवपाची सक्ती आशिल्ली. आतां खण उद्देग बंद जाला. उत्तर आनी दक्षीण गोंय खण निधी फावंडेशना कडेन 200 कोटींचो निधी आसा. हो निधी वापराविणें पडून आसा. ह्या निधीचो वापर शिक्षणीक, सामाजीक, सांस्कृतीक मळा खातीर करप आतां शक्य जातलें, अशी म्हायती खण संचालक सुरेश शनबोगे हांणी दिली. आदींचे तजविजे प्रमाण 50 टक्के निधी खर्च करचो आनी उरिल्लो 50 टक्के निधी कायमस्वरूपी दवरपाची तजवीज आशिल्ली. गोंय खनीज फावंडेशन नेम 2018 हातूंत दुरूस्ती करून पुराय निधीचो वापर करपाची तजवीज केल्या. नेमाच्या चवथ्या कलमांत दुरूस्ती केल्या. प्रधानमंत्री खनीज क्षेत्र कल्याण येवजणेच्या मार्गदर्शक तत्वां प्रमाण जिल्हो खण फावंडेशन निधीचो वापर जातलो. देश पावंड्यार खण वाठाराच्या उदरगती खातीर प्रधानमंत्री खनीज क्षेत्र कल्याण येवजण (पीएमकेकेवाय) सुरू जाल्या. गोंयांत खण फावंडेशन निधीचो वापर हे येवजणे प्रमाण जातलो.
कार्यकारी मंडळ
जिल्होधिकारी (अध्यक्ष), लोकसभा खासदार, राज्यसभा खासदार, खण वाठारांतले आमदार, खण उपसंचालक, कार्यकारी/ सहाय्यक अभियंते (भौशीक बांधकाम खातें), भलायकी खात्याचे उपसंचालक, शिक्षण खात्याचे उपसंचालक, समाज कल्याण खात्याचे उपसंचालक, बायलां उदरगत खातें उपसंचालक, शेतकी खात्याचे उपसंचालक, उदका पुरवण खात्याचे अभियंते, पंचायत खातें संचालक, पर्यावरण शिक्षण केंद्र प्रतिनिधी, खण लीजधारक प्रतिनिधी, प्रदुशण मंडळाचे वांगडी सचीव, खण पिडेस्त वाठार प्रतिनिधी हे वांगडी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
