भांगरभूंय | प्रतिनिधी
न्यायालयः रगाडा न्हंयेंतल्या उत्खनानाची चवकशी करून कारवाय करपाचे आदेश
भांगरभूंय । प्रतिनिधी
पणजीः गोंयांतल्या सैमीक संसाधनाचें संरक्षण करपाची जापसालदारकी सरकाराचेर आसा. ताका लागून ताची चोरी वा बेकायदो उत्खनन केल्ल्याचें दिसल्यार ताचेर कारवाय करपाची लेगीत सरकाराची जापसालदारकी आसा, अशें निरिक्षण नोंद करून चार म्हयन्यांत चवकशी करून संबंदितां सयत अधिकाऱ्यांचेर कारवाय करात, असो आदेश गोंयांतल्या मुंबय उच्च न्यायालयान मुख्य सचिवाक दिला. तशेंच गोंयांतल्या हेर वाठारांनी अशे प्रकार जावचे न्हय हे खातीर उपाय येवजण लागू करपाचो आनी हेर निर्देश लेगीत जाही केल्यात. हे विशींचो आदेश न्या. महेश सोनक आनी न्या. वाल्मिकी मिनिझीस ह्या दोन वांगड्यांच्या न्यायपिठान दिला.
धारबांदोडें म्हालांतल्या रगाडा न्हंयेच्या पात्रांत बेकायदो तरेन रेंव, फातरांचें उत्खनन जाता अशी बातमी एका दिसाळ्यांत 2019 त उडवाडाक आयिल्ली. ते बातमीची उच्च न्यायालयान स्वेच्छा दखल घेवन सुनावणी घेतली. ते उपरांत उच्च न्यायालयान चवकशी करपाचो आदेश जारी केल्लो. ते प्रमाण खण आनी भूगर्भशास्त्र खात्याची चवकशी केली तेन्ना स्वप्नील मळीक हाणें ते बेकायदो काम केल्ल्याचें मुखार आयिल्लें. ताका लागून सरकाराक 1 कोटी 60 लाख 52 हजार 916 रुपयांचें लुकसाण जाल्ल्याचें मुखार आयलां. हे लुकसाणेची वसुली करचे खातीर उच्च न्यायालयान पुलीस म्हानिरिक्षक ओमवीर सिंग बिश्नोई हांचे सयत खण संचालक, दक्षीण गोंय जिल्होधिकारी आनी दक्षीण गोंय पुलीस अधिक्षकांची समिती स्थापन केली. संबंदीत समितीक मळीक हाची मालमत्ता सोदून पावणेर काडून भरपाय करपाची प्रक्रिया सुरू करपाक सांगिल्लें. ते प्रमाण, समितीन उच्च न्यायालयांत अहवाल सादर करून मळीकान पर्यावरणाचें लुकसाण केल्ल्यान समितीन 5.55 लाख रुपयांचो दंड फर्मायल्लो. अशें आसतना समितीन ह्या बेकायदो कामांत वांटो वा आशिर्वाद आशिल्ल्या सरकारी यंत्रणेचेर कारवाये संबंदांत कांयच करूंक नाशिल्ल्यान उच्च न्यायालयान नाराजी उक्तावन हाचेर ठोस करपाय करपाचे निर्देश जारी केल्ले. ते भायर ह्या संबंदांत न्यायालयाक मजत करचे खातीर ज्येश्ठ वकील नोर्मा आल्वारीस हांची अॅकिमस क्युरी म्हूण नेमणूक केल्ली.
हे मजगतीं, सांगें वाठारांत अशेच तरेन बेकायदो तरेन चिऱ्याखणीं चालू आशिल्ल्याचें आनीक एक प्रकरण उच्च न्यायालया मुखार आयलें. तशेंच गोंयांतल्या हेर वाठारांनी व्हड प्रमाणांत बेकायदो रेंव, फातर उत्खनन जाता, अशें न्यायालयाचे नदरेक आयलें. तशेंच याचिका दाखल केले उपरांत सरकारी यंत्रणा कारवाय करता अशें भासयता, अशेंय निरिक्षण नोंद करून कारवाय करपाचे आदेश उच्च न्यायालयान जारी केले. मजगतीं, रान आनी रानवटी जीव संरक्षीत आशिल्ल्या धारबांदोडें म्हालांतले रगाडा न्हंयेच्या पात्रांत बेकायदो रेंव, फातर उत्खनन केल्ल्या प्रकरणांत मुख्य सचिवाक चार म्हयन्यांत चवकशी करून संबंदितां सयत अधिकाऱ्यांचेर कारवाय करपाचे आदेश जारी केलो. तशेंच गोंयांतल्या हेर वाठारांनी सैमीक संसाधनांचें संरक्षण करचे खातीर उपाय येवजण लागू करून संबंदीत अधिकाऱ्यांचेर जापसालदारकी दिवपाचो आदेश जारी केलो. ही प्रक्रिया चार म्हयन्यांत पुराय करून उच्च न्यायालयाक कृती अहवाल सादर करपाचो निर्देश जारी केलो. तशेंच महसूल सचिवान स्वप्नील मळीक हाचे कडल्यान 46.45 लाख रुपया थकीत रकम वसूल करचे खातीर पावलां उखलचीं, तशेंच खण खात्या कडल्यान थकबाकी आशिल्ल्यांची वळेरी घेवन ताचेर कारवाय करून 7 सप्टेंबर मेरेन न्यायालयांत कृती अहवाल सादर करपाचो आनी हेर आदेश जारी केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
