भांगरभूंय | प्रतिनिधी
मडगांव, प्रतिनिधी : कोलवा पुलिसांनी बाणावले सुरू आशिल्ल्या आयपीएल बेटींग रॅकेट धरलें. ह्या प्रकरणांत कर्नाटकांतल्या आठ जाणांक अटक केल्या. तशेंच मोबायल, बॅटींगाचें सामान आनी वाहनां अशें धरून १८ लाखांचो माल जप्त केला.
कोलवा पुलिसांक बेटींग रॅकेटाची म्हायती मेळिल्ली. ते प्रमाण तपास करून रातचें सुमार साडेअकरा वरांचेर वासवाडो वाडी बाणावलेच्या जॅक कॉर्नर लागसारा ही कारवाय केली. हे कारवायेंत दुबावीत भूषण पुजारी, ऋषिकेश कृष्णाजी पाटील, कपिल सावंत, ओंकार प्रमोद पाटील, आङ्ग्रीद नदुबिंल, तोहील बिडीकर, शुभम मनोहर पाटील, सय्यद रमजान बागवान अली ह्या आठ जाणांक ताब्यांत घेवन अटक केली. हे सगळे खानापूर, बेळगांवां रावपी. हे टोळयेन आयपीएलच्या रॉयल चॅलेंजर्स आड गुजरात टायटन्स ह्या मॅचींचेर बेटींग केल्ली.
अटक केल्ल्या सगळ्यांक एके बंदीस्त सुवातेर बेटींग करतना पुलिसांनी धरलें. कोलवा पुलिसांनी ह्या छाप्यांत मोबायल, बेटींगाचें सामान आनी वाहनां मेळून वट्ट १८ लाखांचो माल जप्त केलो. दुसर्या राज्यांतल्यान आयिल्ले नागरीक भाड्याक जागो वा बंगलो घेवन ते सुवातेर बेटींग करतात. ताका लागून कोलवा पुलीस आनी आयपीएल टोळी कार्यरत आसा काय हाचो सोद घेतात. कोलवा पुलीस निरीक्षक सुनील पडवळकार हांच्या मार्गदर्शना खाला फुडली कारवाय करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
