भांगरभूंय | प्रतिनिधी
पणजी, प्रतिनिधी : केंद्रांतलें नवें सरकार वा नवे खासदार वेंचपा खातीर समेस्त गोंयचे मतदार मंगळारा मतदान करतले. गोंय ल्हान राज्य आशिल्ल्यान गोंयच्या खासदारांचो आसपाव केंद्रीय मंत्रिमंडळांत सोंपेपणी जायना. तरी एदुआर्द फालेरो, रमाकांत खलप, श्रीपाद नायक आनी सर्गेस्त मनोहर पर्रिकार हांकां देशाचे मंत्रिपद सोबोवपाची संद मेळ्ळी. खलप आनी पर्रीकार हे दोन फुडारी राज्यांतूय मंत्री आशिल्ले. आतां मेरेन राज्याचे (गोंयचे) आनी देशाचे मंत्री जावपाचो मान फकत ह्या दोन फुडाऱ्यांक मेळ्ळा.
1990 वर्सा चर्चील आलेमांव आनी डॉ. बार्बोजा हांचें सरकारांत रमाकांत खलप हे उपमुख्यमंत्री आशिल्ले. 1996 वर्सा उत्तर गोंय सावन लोकसभा वेंचणुक जिखले उपरांत केंद्रात ते मंत्री जाले. केंद्रांतल्या देवेगौडा आनी गुजराल हांच्या सरकारांत ते कायदो आनी न्याय खात्याचे राज्यमंत्री आशिल्ले.
पयलीं 2000 ते 2005 आनी उपरांत 2012 ते 2014 मेरेन मुख्यमंत्री आशिल्ले सर्गेस्त मनोहर पर्रीकार हे देशाचे संरक्षण मंत्री जाले. 2017 उपरांत ते परत राज्याचे मुख्यमंत्री जाले. खलप हे लोकसभेर वेंचुन येवन मंत्री जाले जाल्यार पर्रीकार राज्यसभा वांगडी जावन देशाचे संरक्षण मंत्री जाले.
सर्गेस्त राजीव गांधी आनी नरसिंह राव हांच्या सरकारांत मंत्री आशिल्ले एदुआर्द फालेरो हे केन्नाच राज्याचे मंत्री नाशिल्ले. उत्तर गोंयचे भाजप उमेदवार श्रीपाद नायक हे बरोच तेंप केंद्रात मंत्री आसात. सर्गेस्त वाजपेयी सरकारांत पसून ते मंत्री आशिल्ले. राज्यांत मात ते केन्नाच मंत्री नाशिल्ले. राज्याचे आनी देशाचें मंत्रिपद सांबाळपाचो भोवमान फकत खलप आनी मनोहर पर्रीकार हांकांच फावो जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
