भांगरभूंय | प्रतिनिधी
आयच्या तंत्रज्ञानाच्या युगांत खुबशीं कामा रोखडींच कांय सेकंडां भितर जातात. सगळें ऑनलायन उपलब्ध आशिल्ल्यान आमचीं सगळीं कामां सोपीं जाल्यांत. मात ह्याच इंटरनेट, तंत्रज्ञाना वरवीं लोकांक ऑनलायनूय फटयतात. ताका लागून सायबर गुन्यांवकार विवीध तरा फटोवपा खातीर वापरतात. अशी एक नवी पद्दत फटोवपाची आयल्या. बंगळुरूचे एके बायले वांखडा ही घडणूक घडली.
बंगळुरूचे एके बायलेन सोशल मिडिया एक्साचेर पोस्ट करून आपल्या वांगडा कितें घडलें तें सांगलें. नागरिकांनी जतनाय घेवची असोय सल्लो तिणें दिला. तिणें सांगलें, ‘‘कांय दिसां आदीं हांव ऑफिसांत काम करताली तेन्ना म्हाका एका अनवळखी नंबराचेर फोन आयलो. अदिती, तुज्या बापायक पयशे धाडपाचे आसात. पूण कांय तंत्रीक कारणांक लागून तें शक्य ना. ते तुका धाडल्यार जाता?’ ताणें म्हाका विचारलें. तशेंच ताणें म्हजो नंबर दाखोवन पुष्टी केली. मागीर हांवें तांकां ‘हय’ म्हणलें.
तिणें फुडें सांगलें, ‘‘कॉल जाले उपरांत कांय मिण्टांनी म्हाका मेसेज आयलो, पयलीं १० हजार आनी मागीर ३० हजार रुपया म्हज्या खात्यांत जमा जाले म्हणून. मागीर त्या मनशान परत फोन करून म्हणलें, तुज्या बापायक ३००० धाडपाचे आशिल्ले, मात चुकून ३०००० धाडले, उरिल्ले पयशे परत करशी? हांव हॉस्पिटलांत उबो आसां, म्हाका दोतोराक पयशे दिवपाचे आसा. अशें तांणी म्हणलें. म्हाका ताचेर दुबाव आयले उपरांत हांवें मोबायलाचेर आयिल्ली मॅसेज पळयली. ती मेसेज बँकेच्या नंबराचेर न्हय तर अनवळखी नंबराचेर आयिल्ली. मागीर हांवें रोखडोच त्या मनशाक फोन केलो, पूण ताचो फोन बंद आशिल्लो.’’
ही सगळी घडणूक घडल्या उपरांत हे बायलेन नागरिकांक जतनाय घेवपाचो सल्लो दिला. तशेंच चुकून तुमच्या खात्यांत पयशे जमा जाल्यात अशें कोणेंय सांगलें जाल्यार पयलीं तपासात अशें तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
