भांगरभूंय | प्रतिनिधी
नवीदिल्ली, खबरां संस्था ः भारतीय रेल्वेन प्रवास करप्यांचो आंकडो लाखांनी आसा. रेल्वे प्रवाशांक विवीध सुविधा दिवपाचो यत्न करीत आसता. ऑनलायनच्या ह्या युगांत प्रवाशांक तिकेट काडपा खातीर लांबचे लांब रांकेंत रावपाची गरज ना. रेल्वे आरक्षण तिकेट जे तरेन आयआरसीटीचे वेबसायटी वयल्यान काडूं येता तशीच साधारण तिकेट, प्लॅटफॉर्म तिकेट आनी म्हयन्याचो पास घरा बसून काडूं येता. हे खातीर आसपी पांच किलोमीटरची अट रद्द केल्या. यूटीएस ऍपा वयल्यान ही सुविधा सुरु केल्या. तशेंच हे तरेन तिकेट काडल्यार तीन टक्के बोनसूय मेळटलो.
यू.टी.एस.ऍप वयल्यान सुविधाय
रेल्वे मंत्रालयान मोबायल ऍप्लिकेशन यू.टी.एस. वयल्यान सुविधाय दिल्या. ताका लागून प्ले स्टोरा वयल्यान यू.टी.एस. (अनरिझर्व्हड तिकेट सिस्टम) डावनलोड करचें पडटलें. उपरांत ताचेर लॉगीन केल्या उपरांत तुमकां केन्नाय जनरल तिकेट, पास आनी प्लॅटफॉर्म तिकेट काडपाक मेळटली. ही तिकेट काडपा खातीर ३ टक्के बोनस दितले. ताका लागून रांगेत रावपाची गरज ना. मोडच्या पयशांची गरज कटकट आसची ना. वेळ वाटवतलो. तशेंच ह्या ऍपाक लागून पी.एन.आर. स्टेट्स, हॉटेल बुकींग, ट्रेनीचे रनिंग स्टेट्स, सीट उपलब्धताय, आल्टरनेटिव्ह ट्रेन ही म्हायती मेळटली.
आदीं हो नेम आशिल्लो
यूटीएस ऍपा खातीर आदीं पांच किलोमिटरची मर्यादा आशिल्ली. स्टेशनाच्या वाठारांत पांच किलोमिटरा भितर ह्यो तिकेटी काडपाक मेळटल्यो. आतां ही मर्यादा रद्द केल्या. तुमी कितल्या अंतराचेर आसल्यार हें तिकेट काडपाक शकता. आरक्षण तिकेटी सारकें घरा बसून जनरल तिकेट यूटीएसाचेर काडपाक मेळटलें.
यू.टी.एस. ऑन मोबायल ऍप ऍड्रॉयड, आई. ओ.एस. आनी विंडोज ऑपरेटिंग सिस्टमाचेर फुकट डावनलोड करपाक मेळटा. ह्या ऍपांतल्या तिकेटीचें पेमेंट करपा खातीर बँकींग वा व्हॅलेटचो वापर करूं येता. जनरल तिकेट काडपा खातीर आसपी लांबचे लांब रांकेंत उबें रावचे परस आतां मोबायलाचेर तिकेट काडप सोंपें जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
