साकरेची पातळी उणी करपाची आसा ?
भांगरभूंय | प्रतिनिधी
गोडेंमूत हें घातक दुयेंस आसलें तरी लोक ताका खूब हलकें घेतात. हें तशें एक गंभीर दुयेंस, जाका लागून मरण पसून येवपाचो धोको आसता. भारतांत सुमार 70 ते 75 टक्के लोकांक गोडेंमूत जाता. अजापाची गजाल म्हणल्यार, तें आशिल्ल्या लोकांक ह्या दुयेंसां संबंदी चड कांयच खबर आसना. खास करून जाणटेल्यांक.
फकत साकर खाल्ल्यान गोडेंमूत जाता वा साकर खावप बंद केल्यार तें कमी जाता, हें लोकांक खबर आसा. स्वादुपिंडांत इन्सुलिन सारकें तयार जायना वा कुडींतल्यो पेशीं इन्सुलिन स्वीकारूंक शकनात जाल्यार गोडेंमूत जाता. जायते जाण जेवचे पयलीं गोडेंमूताची वखदां घेतात आनी कांय जाण इन्सुलिनाचीं इंजेक्शनांय घेतात हें तुमी पळयलां आसतलें. इन्सुलिनाची इंजेक्शना घेवप्या कडेन मातशी चूक जाली, वेळार जेवंक
ना वा वेळार इंजेक्शन घेना जाल्यार हें जीवाक घातक थारूं शकता.
चार प्रकार
गोडेंमूताचे जरी 4 प्रकार आसले तरी चडशा लोकांक रगतांतली साकर चड वा कमी आसता. ह्या दुयेंसाक वखद ना. वखद तुमच्या इन्सुलिनाचेर नियंत्रण दवरपा खातीर दितात. कांय साद्या घरगुती उपायांनीय ह्या दुयेंसांतल्यान सुटका मेळूं येता. हाचे खातीर कसलेंच वखद घेवपाची गरज ना. हे कांय उपाय-
- बेलाची स पानां, कडुलिंबाची स पानां, तुळशीची स पानां, वायंग्याची स हरवी पानां आनी तीन काळी मिरयां बारीक करून खाली पोटार उदका वांगडा घेतल्यार गोंडेमूत नियंत्रणात येंव शकता. हें पिले उपरांत सुमार अर्द वर तरी कांय खावचें न्हय.
- 10 मिलीग्राम आवळ्याच्या रसांत 2 ग्रॅम हळद घालून पिल्यार गोंडेमूताचेर नियंत्रण दवरूं येता. हो उपाय दिसाक दोनदा करचो.
- तुळशीच्या पानांत अँटी- ऑक्सिडंट, अँटीबायोटीक, अँटीबॅक्टेरियल, अँटीएजिंग, अँटीफंगल गुणधर्म आसतात. ताचे पासून इजेनॉल, मिथाइल इझिनॉल आनी कॅरिओफिलीन तयार जाता. हें सगळे घटक इन्सुलीन सांठोवपी पेशींक योग्य तरेन कार्य करपाक मजत करतात. त्या भायर तांतूंत अशे घटक आसतात, जे स्वादुपिंडांतल्या बीटा पेशींक इन्सुलिनच्या दिशेन सक्रिय करतात. ह्यो पेशी इन्सुलिनचो स्राव वाडयतात. सकाळी खाली पोटार दोन ते तीन तुळशीची पानां चाबून खावचीं वा तुळशीचो रसूय पिवं शकतात. हाका लागून तुमच्या रगतांतली साकर नियंत्रणात येतली. जर तुमी साकर कमी जावपाचें वखद घेता आसत जाल्यार हें करचे पयलीं दोतोरांचो सल्लो घेवचो.
- अमालतासाचीं (Golden flower tree) थोडीं पानां धुवन तांचो रोस काडचो. सदां सकाळीं पाव कप रोस निराळ्या पोटार पियेवचो. हो रोस गोडेंमूताच्या उपचारांत फायदेशीर थारता.
- ग्रीन टींत पॉलिफेनॉलचे प्रमाण चड आसतात. हें एक सक्रिय अँटी-ऑक्सिडंट, जें रगतांतले साकरेचेर नियंत्रण दवरपाक मजत करता. सदां सकाळी आनी सांजचे ग्रीन टी खूब फायद्याची.
- जेवणां उपरांत बडीशेप खावची. बडीशेप खाल्ल्यान गोंडेंमूत नियंत्रणात उरता. जांबळांच्या हंगामांत काळें मीठ घालून जांबळां खाल्यार गोडेंमूत कमी जाता. तशेंच 2 – 2 चमचे बेरीच्यो बियो सुकोवन पिठो करून सकाळीं आनी सांजे मातश्या गरम उदकान घालून पियेल्यार साकर कमी जाता.
- म्हसकाच्यो सांगो दक्षीण भारतांतल्या जेवणांतलो मुखेल भाग. आयुर्वेदिक वखदांनी हाचो वापर करतात. सांगो आनी पानांच्या रोसाचें सेवन गोडेंमूताची समस्या कमी करपाक उपेगी पडटा.
- सालाद वा भाजी म्हणून सलगम (TURNIP) खायात. गोडेंमूताच्या उपचारा वेळार सलगम खाल्ल्यार फायदेशीर थारता.
- सदां सकाळीं खाली पोटार गरम उदका वांगडा फ्लॅक्ससीड्सचो पिठो घेतल्यार गोडेंमूत कमी जाता. फ्लॅक्ससीड्सांत तंतू (FIBRE) भरपूर आसतात, जाका लागून ताका चरबी आनी साकर योग्य रितीन शोशून घेवपाक मजत जाता. फ्लॅक्ससीड्स गोडेंमूत जाल्ल्यांक जेवणा उपरांतची साकर सुमार 28 टक्क्यांनी कमी करता.
- सदां सकाळी कारात्यांचो रोस वा कारात्याची भाजी खाल्ल्यान गोंडेंमूत कमी जावं येता. तशेंच रातचें न्हिदपा पयलीं एक ग्लास उदकांत मेथये बियो घालात. हें उदक सकाळीं खाली पोटार पियात आनी मेथये बियो चावून खायात.
- कांटेकोरीचो रोस आवाळ्याच्या रोसांत घालून पियेल्यार गोंडेंमूत दुयेंतींक बरो फायदो जाता. रगतांतल्या साकरेची पातळी कमी दवरपा खातीर म्हयनो भर सदच्या जेवणांत एक ग्रॅम तिखयेचो
वापर करात. साकरेचेर घरगुती उपाय म्हूण तिखी वापरूं येता.
- साकरेची पातळी कमी करपाक आंब्यांच्या पानांचो वापर लेगीत खूब फायदेशीर. 1 ग्लास उदकांत 10 – 15 पानां रातभर भिजयात आनी सकाळी तें उदक पियात.
दोतोरा कडेन केन्ना वचप
दोतोरा कडेन गेले उपरांत ते चाचणी करूंक सांगतात आनी रिपोर्टा उपरांतूच वखदां बरोवन दितात. लक्षांत दवरात, दोतोरांच्या सल्ल्या शिवाय गोंडेंमुताचें वखद घेवचें न्हय, अशें करप जिवाक घातक थारूं शकता.
गोंडेंमुताच्यो दोन तपासण्यो आसात, एक फास्टींग म्हणल्यार रिकाम्या पोटार आनी एक खाल्ल्या उपरांत. जेवणां उपरांतच्या तपासणेंत साकरेचे प्रमाण वाडल्यार फास्टींगच्या चाचणे कडेन चड लक्ष दितात. फास्टिंगच्या तपासणेंत साकरेचे प्रमाण चड आसत जाल्यार ती गंभीर गजाल.
तुमकां दोतोरांच्या सल्ल्याची खूब गरज आसा आनी भलायके कडेनय चड लक्ष दिवपाची गरज आसा. तशेंच तुमी तुमच्या आहारा बाबतींत खूब काळजी घेवप गरजेंचें. पूण, जर तुमची फास्टिंग शुगर नॉर्मल वा कमी आसत जाल्यार तुमकां काळजी करपाची गरज ना. फकत तुमच्या खाणाचेर नियंत्रण दवरपाचें. तुमच्या भलायकेची तपासणी वेळावेळार करून घेवची. खासा करून गुरवारपणांत आनी पिरायेच्या 40 वर्सां उपरांत नेमान तपासणी करची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
