काँग्रेस सत्तेर आयल्यार संविधानांत बदल

भांगरभूंय | प्रतिनिधी

विनोद तावडेः काँग्रेस उमेदवार संविधान विरोधी आशिल्ल्याचो आरोप

• बी. एल. संतोष ताकतिकेन गोंयांत
• फाल्यां प्रधानमंत्री नरेंद्र मोदींची सभा

भांगरभूंय । प्रतिनिधी

पणजीः काँग्रेस आमचेर आरोप करता, मात तांचेच उमेदवार संविधान विरोधी आसात. काँग्रेसीचे उमेदवार, फुडारी अप्रत्यक्षपणान फाटले कांय दीस जाले संविधान बदलपाच्यो गजाली करतात. ताका लागून काँग्रेस पक्ष सत्तेर आयल्यार संविधानांत बदल करतलो, असो दावो भाजपाचे राष्ट्रीय सरचिटणीस विनोद तावडे हांणी केलो. बिरेस्तारा पणजे जाल्ले पत्रकार परिशदेंत ते उलयताले. ह्या वेळार नरेंद्र सावयकार आनी गिरिराज पै वेर्णेंकार हाजीर आशिल्ले.

तावडे हांणी सांगलें, दक्षीण गोंयांतल्या एका उमेदवारान संविधान आमचेर थापलें, अशें म्हणिल्लें. त्या उमेदवारान डॉ. बाबासाहेब आंबेडकर हांचो अपमान केला. हे बाबतींत राहूल गांधी हांचीय परवानगी आसा, अशें तांणी म्हणलां. अशें आसले तरी आयज मेरेन राहूल गांधी हांणी कसलीच प्रतिक्रिया दिवंक ना. तांणी स्वता मुखार येवन हे विशीं स्पश्टीकरण दिवपाची गरज आसा.

दुसरे एके घडणुकेंत काँग्रेस फुडाऱ्यांनी इनहेरिटन्स टॅक्स लायतले, अशें सुचीत केलां. ते प्रमाण घरांतलो कर्तो दादलो भायर पडलो जाल्यार ताची वडिलोपार्जीत संपत्तींतलो व्हड वांटो सरकाराक कर म्हूण दिवचो पडटलो. ह्या वांट्याचें सरकार वांटप करतलें. तें कोणाक आनी कशें वांटप जातलें, हें हे आदींच आदले प्रधानमंत्री मनमोहन सिंग हांणी सांगिल्लें. ताका लागून लोकांच्या वडिलोपार्जीत संपत्तीचेर लेगीत काँग्रेसीचो दोळो आसा, हें स्पश्ट जाता. हे दोन देखी वयल्यान काँग्रेस पक्ष सत्तेर आयल्यार कितें करतलो हाची झलक मेळ्ळ्या. ते खातीर लोकसभा वेंचणुकेंत गोंयच्या मतदारांनी विचार करून मत दिवप गरजेचें आसा, अशें तावडे हांणी सांगलें.

बी. एल. संतोष हांणी घेतली गाबो समितीची बसका

देशा सयत गोंयांत वेंचणुकेचें वातावरण तापलां. भाजपाचे राष्ट्रीय सरचिटणीस बी. एस. संतोष हांणी गोंयांत येवन गाबो समितीची बसका घेतली. हे लोकसभा वेंचणुके सयत विवीध विशयांचेर बसकेंत चर्चा जाली. संतोष हांणी गोंयच्या दोनूय मतदारसंघांनी भाजप उमेदवार वेंचून येवचे खातीर सामान्य कार्यकर्ते ते आमदार, मंत्र्यांक काम करपाच्यो सुचोवण्यो केल्यो. मजगतीं, कांय फुडारी पक्षा खातीर काम करिनात अशी सुलूस लागिल्ल्यानूच संतोष ताकतिकेन गोंयांत आयिल्ल्याची म्हायती मेळ्ळ्या.

बसकेक मुख्यमंत्री डॉ प्रमोद सावंत, प्रदेशाध्यक्ष सदानंद शेट तानावडे, गोंय प्रभारी आशीष सूद, केंद्रीय मंत्री श्रीपाद नायक, सभापती रमेश तवडकार, मंत्री विश्वजीत राणे, मॉवीन गुदिन्हो, दामोदर नायक, निलेश काब्राल, चंद्रकांत कवळेंकार, नरेंद्र सावयकार हांचे सयत गाबो समितींतले हेर पदाधिकारी हाजीर आशिल्ले. ह्या वेळार प्रधानमंत्री नरेंद्र मोदी हांचे 27 एप्रीलाक जावपा आशिल्ले जाहीर सभेचे तयारी विशीं लेगीत चर्चा जाली.

संतोष हांणी दोनूय मतदारसंघांत भाजप उमेदवार दिले उपरांत सामान्य लोकांचें मत कितें आशिल्लें? आतां प्रचाराचो दुसरो पांवडो सोंपत आयले उपरांत लोकांचें कितें मत आसा? हे विशीं गोंयांतल्या फुडाऱ्यां कडल्यान म्हायती घेतली. फाटले लोकसभा वेंचणुकेंत दोनूय मतदारसंघांनी कसल्यो समस्या आशिल्ल्यो? त्यो सुटाव्यो जाल्यो? तशेंच आतां सामान्य लोकांक कसल्यो समस्या आसात? तांच्यो कसल्यो अपेक्षा आसात, हाची लेगीत म्हायती घेतली.

सध्याचे स्थितींत दोनूय मतदारसंघांनी लोकांचे कांय प्रस्न, समस्या आसत जाल्लयार केंद्रांत मोदी सरकार परतून आयल्यार त्यो सोडयतले, अशें आस्वासन थंयच्या लोकांक दिवपाच्यो सुचोवण्यो लेगीत संतोष हांणी केल्यात. दोनूय मतदारसंघांत भाजपाचे उमेदवार वेंचून येवचे खातीर बूथ पांवड्या वयल्या कार्यकर्त्यां सयत वरिश्ठ फुडाऱ्यां कडल्यान नेटान काम करून घेवपाच्यो सुचोवण्यो लेगीत संतोष हांणी केल्यात.

ते भायर वेंचणूक काळांत सोशल मिडियाच्या वापराचेर भर दिवपाच्यो सुचोवण्यो संतोष हांणी केल्यात. पक्षा वतीन काँग्रेसीच्या दोनूय उमेदवारा आड लोकां मुखार कसले मुद्दे मांडटात? ते खातीर सोशल मिडियांतल्यान कसले यत्न चालू आसात? भाजपाच्या उमेदवारां आड वचपी गजालींक सोशल मिडियाच्या माध्यमांतल्यान कशी जाप दितात, हाचोय नियाळ संतोष हांणी घेतलो. तशेंच दोनूय जिल्ह्यांतल्या फुडाऱ्यां वांगडा संतोष स्वतंत्र बसका घेतले. 

1 वा 2 मेक अमीत शाह हांची जाहीर सभा

प्रधानमंत्री नरेंद्र मोदी हांची 27 एप्रीलाक सांकवाळे जाहीर सभा आयोजीत केल्या. ते भायर उत्तर गोंयांत म्हापश्यां अमीत शाह हांची 1 ते 2 मे मजगतीं जाहीर सभा जातली, अशी म्हायती गोंय भाजप प्रदेशाध्यक्ष सदानंद शेट तानावडे आनी भाजपाचे उत्तर गोंय उमेदवार श्रीपाद नायक हांणी दिली.

प्रधानमंत्री मोदी हांचे सांकवाळे जाहीर सभा जातली. ते खातीर गोंय भाजपाचे प्रभारी बी. एल. संतोष हांणी पणजे नियाळ बसका आपयिल्ली. मुख्यमंत्री डॉ. प्रमोद सावंत, भाजप प्रदेशाध्यक्ष सदानंद शेट तानावडे, उत्तर गोंयचे उमेदवार श्रीपाद नायक, हेर मंत्री, आमदार आनी पदाधिकारी हे बसकेक हाजीर आशिल्ले. संतोष हांणी मोदी हांचे जाहीर सभेचे तयारेचो नियाळ घेतलो. बी. एस. संतोष हांणी मोदी हांचे सभे विशीं चर्चा केली. जे सुवातेचेर ही सभा जातली ते सुवातेची पळोवणी केली. दक्षीण गोंयच्या मतदारसंघांतले सगळे आमदार, मंडळ अध्यक्ष, प्रभारी आनी मुखेल कार्यकर्ते हांकां नियाळ घेवपाक लायला. हीच प्रक्रिया उत्तर गोंयांत भाजपाच्या जिल्हो कचेरेंत जातली. मोदी हांची जाहीर सभा दक्षीण गोंयांत जाता ते खातीर अमीत शाह हांची सभा उत्तर गोंयांत जातली, अशें तानावडे हांणी सांगलें.

आमी घटना दुरुस्ती करतले

युरी आलेमांवः भाजपान केला घटनेचो खून

पणजीः काँग्रेस पक्ष सत्तेर आयलो जाल्यार घटना दुरुस्ती करतले. मात भाजप आरोप करता तशी घटना दुरुस्ती न्हय जाल्यार धाव्या अनुसुचींत सुदारणा करून पक्षांतर करपी लोकप्रतिनिधींक तत्काळ अपात्र करतले. काँग्रेसीच्या ह्या आस्वासनाक लागून भाजप फुडारी विनोद तावडे भियेल्यात, अशें प्रत्युत्तर विरोधी पक्ष फुडारी युरी आलेमांव हांणी दिलें.

आलेमांव हांणी सांगलें, तावडे हांच्या विधानाचो आमी निशेध करतात. भाजप फुडारी चुकीची म्हायती पातळयतात. संविधानाच्या रक्षणा खातीर काँग्रेस बांदिल्लो आसा. हाच्या उरफाटे जांणी खूबश्या राज्यांनी पक्षांतरां करून सत्ता मेळयली त्या भाजपानूच घटनेचो खून केला. भाजपा कडल्यान आमकां संविधानाचे धडे नाकात. संविधानाचो अनादर करपी भाजप फुडारीच आसात.

भाजपान फाटल्या 10 वर्सांत पक्षांतरांक उर्बा दिवन लोकशाय पद्दतीन वेंचून आयिल्लीं खूबशीं सरकारां उमथून उडयल्यांत. तांणी मडगांव पालिकेंत हे आदीं हारिल्ल्या नगराध्यक्षाक परतून वेंचून हाडचे खातीर पालिकेच्या कायद्यांत दुरुस्ती केली. तावडे हांणी संविधानाचेर उलयतना दिगंबर कामत, आलेक्स सिक्वेरा, मायकल लोबो, संकल्प आमोणकार आनी हेर चार पक्षबदलू आमदारां सयत पत्रकार परिशद घेवपाक जाय आशिल्लीस अशें आलेमांव हांणी सांगलें.

सध्या भाजप आतां हुस्क्यांत आसा. कारण जून 2024 त इंडिया आघाडी सरकार सत्तेर येतलें हें निश्चीत आसा. आमचें सरकार स्थापन जाले उपरांत ज्या राज्यांनी भाजपान फाटल्या दारांतल्यान सत्ता मेळयल्या तीं सगळीं सरकारां पडटलीं. गोंयांत लेगीत नवें सरकार येतलें, असो दावो युरी आलेमांव हांणी केलो.