भांगरभूंय | प्रतिनिधी
पणजी, बातमीदार ः केंद्र सरकारान गोंयां खातीर 9 वांगड्यांची राज्य पांवड्यावेली पर्यावरणीय परिणाम मूल्यांकन प्राधिकरणाची थापणूक केल्या. ताची अधिसुचोवणी केंद्रीय रान, पर्यावरण मंत्रालयान जारी केल्या. प्राधिकरणाचे अध्यक्ष म्हणून डॉ. पुरुषोत्तम पेडणेकार हांची नेमणूक जाल्या. डॉ. दीपक गायतोंडे हांची वांगडी म्हणून जाल्यार पर्यावरण संचालक वांगडी सचीव म्हणून काम पळयतले. हे समितीचो कार्यकाळ तीन वर्सांचो आसतलो.
हाचे भायर प्राधिकरणाक मजत करपा खातीर 9 वांगड्यांची तज्ञ मूल्यांकन समितीय स्थापन केल्या. हे समितीचो अध्यक्ष म्हणून पाश्कोल नोरोन्हा हाची नेमणूक जाल्या. जाल्यार वांगडी म्हणून डॉ. नितीन सावंत, डॉ. सुभाष भोसले, प्रसाद रांगणेकार, डॉ. जुझे फालेरो, संजय जहागिरदार, सुजीतकुमार डोंगरे, संजय आमोणकार हांची नेमणूक जाल्या. समितीचो वांगडी सचीव म्हणून प्रदुशण नियंत्रण मंडळाचो अभियंतो आसतलो.
राज्यांत खंयचोय व्हड प्रकल्प स्थापन करचे पयलीं ह्या प्राधिकरणाची मान्यताय घेवप गरजेचें. प्राधिकरण प्रकल्प जावपी वाठाराच्या पर्यावरणीय परिणामाचो अभ्यास करतले. उपरांत ह्या प्रकल्पाक पर्यावरण प्रमाणपत्र दितले. हाचे प्रमाण म्हामार्ग बांदप, व्हड शारां बांदप, हेर इमारती बांदप, कारखाने वा उद्देगीक वसाहती उबारप, खणकाम काम अश्या वेगवेगळ्या प्रकल्पां खातीर प्राधिकरणाची पयलींच परवानगी घेवची पडटली. प्राधिकरण तज्ञ समितीच्या शिफारशींच्या आदाराचेर निर्णय घेतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
