मतदानाच्या हक्का संबंदांत गोंयांत बायलां अदीक जागरूक

भांगरभूंय | प्रतिनिधी

फाटले दोन लोकसभा वेंचणुकेंत महिला मतदार दादल्यां परस मुखार; देशांत तिसरे सुवातेर

भांगरभूंय । पिनाक कल्लोळी

पणजीः मतदारांचो विचार केलो जाल्यार गोंयांत दादल्यांचे तुळेंत महिला मतदारांची संख्या चड आसा. फाटले दोन लोकसभा वेंचणुकेंत मतदानाचो हक्क वापरपांत गोंयांतल्यो महिला मतदार देशांत तिसरे सुवातेर आशिल्ल्यो. तशेंच फाटले लोकसभा वेंचणुकेंत गोंयांत जाल्ल्या मतदानांत महिला मतदार दादल्यां परस मुखार आसात. वेंचणूक आयोगान जाहीर केल्ल्या 2014 आनी 2019 चे लोकसभा वेंचणुकांच्या अहवालांतल्यान ही म्हायती मेळ्ळ्या.

मेळिल्ले म्हायती प्रमाण 2014 त गोंयांतले मतदार वळेरेंत वट्ट 10 लाख 60 हजार 777 मतदारांची नोंदणी आशिल्ली. तातूंत 5 लाख 32 हजार 469 बायलो आनी 5 लाख 28 हजार 308 दादले मतदार आशिल्ले. वट्ट नोंदणी केल्ल्या मतदारां मदल्या 8 लाख 17 हजार 440 जाणांनी मतदान केलें. तातूंत 4 लाख 20 हजार 30 महिला जाल्यार 3 लाख 97 हजार 410 दादले मतदार आशिल्ले. वट्ट मतदानांत महिला मतदारांचें प्रमाण 51.38 टक्के जाल्यार दादले मतदारांचे प्रमाण 48.62 टक्के आशिल्लें. तेच प्रमाण 2019 चे लोकसभा वेंचणुकेंत गोंयांतले मतदार वळेरेंत वट्ट 11 लाख 36 हजार 113 मतदारांची नोंदणी आशिल्ली. तातूंत 5 लाख 80 हजार 54 महिला जाल्यार 5 लाख 56 हजार 59 दादले मतदार आशिल्ले. वट्ट नोंदणी केल्ल्या मतदारां मदले 8 लाख 53 हजार 725 जाणांनी मतदान केलें. तातूंत 4 लाख 41 हजार 780 महिला जाल्यार 4 लाख 11 हजार 944 दादले मतदार आशिल्ले. वट्ट मतदानांत महिला मतदारांचें प्रमाण 51.75 टक्के जाल्यार दादले मतदारांचें प्रमाण 48.25 टक्के आशिल्लें.

2009 त दादले मतदार मुखार

2009 चे लोकसभा वेंचणुकेंत मात दादले मतदार बायलांचे तुळेंत मातशे मुखार आशिल्ले. 2009 त गोंयांतले मतदार वळेरेंत वट्ट 10 लाख 20 हजार 794 मतदारांची नोंदणी आशिल्ली. तातूंत 5 लाख 8 हजार 319 बायलो जाल्यार 5 लाख 12 हजार 474 दादले मतदार आशिल्ले. वट्ट नोंदणी केल्ल्या मतदारां मदल्या 5 लाख 64 हजार 255 जाणांनी मतदान केलें. तातूंत 2 लाख 73 हजार 482 महिला जाल्यार 2 लाख 90 हजार 278 दादले मतदार आशिल्ले. वट्ट मतदानांत महिला मतदारांचें प्रमाण 48.46 टक्के जाल्यार दादले मतदारांचें प्रमाण 51.44 टक्के आशिल्लें.