भांगरभूंय | प्रतिनिधी
भारतान फाटल्या वर्सा चीनाक फाटीं घालून संवसारांतलो सगळ्यांत चड लोकसंख्या आशिल्लो देश जावपाचो ‘मान’ मेळयलो. भारत चीनाक फाटीं घालून सगळ्यांत चड लोकसंख्या आशिल्लो देश जातलो असो अदमास तज्ञांनी 2023 वर्सा उक्तायिल्लो. संवसारांतले लोकसंख्येचो अभ्यास करपी संयुक्त राश्ट्रांच्या संघटनेन, युनायटेड नेशन्स पॉप्युलेशन फ्रंट हे संस्थेन ह्या अदमासाक तेंको दिल्लो.
संयुक्त राश्ट्रांच्या लोकसंख्या आघाडेन जाहीर केल्ल्या आंकडेवारी प्रमाण, आयज भारताची लोकसंख्या 144 कोटी मेरेन पावल्या. फाटल्या वर्सा भारताची लोकसंख्या 1,428.6 दशलक्ष जाल्यार चीनाची लोकसंख्या 1,425.7 दशलक्ष आशिल्ली. दोनूय देशां मदीं 29 लाख फरक आसा. भारताची लोकसंख्या फकत एका वर्सात 2 कोटी वाडल्या. चीनाची लोकसंख्येची वाड दर उणी जायत आसा जाल्यार भारताची लोकसंख्येची वाड दर वाडत आसा. ही गती अशीच चालू उरल्यार भारताची लोकसंख्या रोखडीच देड अब्ज मेरेन पावतली.
आयज भारताची लोकसंख्या 144 कोटी मुखार पावल्या. देशाक स्वातंत्र्य मेळ्ळें तेन्ना आमची लोकसंख्या फक्त 30 कोटी आशिल्ली, म्हणल्यार फाटल्या पंचाहत्तर वर्सांत ती 114 कोटी वाडल्या. आयज आमी लोकसंख्येच्या मळार संवसारांत पयल्या क्रमांकाचेर पावल्यात, अर्थांत ही तशी अभिमान दिसपा सारकी गजाल न्हय.
देशांतल्या सगळ्या समस्यांचें मूळ वाडत वचपी लोकसंख्येंत आसा. नेटान वाडपी लोकसंख्येक लागून देशांत अन्न, कपडे, आलाशिरो, रोग, गरिबी अशो जायत्यो समस्या निर्माण जाल्यात. खास करून वाडत वचपी लोकसंख्या देशाचे प्रगतींत व्हड आडखळ जावपाक लागल्या. लोकसंख्येचे वाडीचो परिणाम सगळ्या आंगांचेर जाता आनी उदरगतीक आडमेळीं येतात. वाडत वचपी लोकसंख्येक लागून देशांतल्या सगळ्या नागरिकांच्यो मुळाव्यो गरजो सरकाराक पुराय करप शक्य जायना. ही लोकसंख्या नियंत्रणांत हाडपा खातीर सरकारी पांवड्या सावन फावो ते यत्न सुरू आसात. पूण तांकां अजूनय समाजाचो तेंको ना. सरकाराच्या पांवड्यार कुटुंब नियोजन मोहीम प्रभावीपणान चालीक लावपाची गजाल बरी आसली तरी पूत जावचो हे आशेन तीन ते चार भुरग्यांक जल्म दिवपी समाजांत व्हड वर्गूय आसा. ह्या आनी अशा लोकांक लागूनच ही मोहीम नेट घेना.
लोकसंख्या नियंत्रणांत हाडपाची आसल्यार नवे पिळगेंत लोकसंख्ये विशीं योग्य जागृताय, दृश्टिकोन निर्माण करपाची गरज आसा. ते खातीर तिका लोकसंख्येचें शिक्षण दिवंक जाय. फकत 24 वर्सांत संवसारांतली लोकसंख्या 5 अब्ज वाडली आनी 75 वर्सांत आमच्या देशाची लोकसंख्या 114 कोटींनी वाडली. लोकसंख्या ह्या प्रमाणांत वाडत रावली जाल्यार लोकसंख्येचो भार पृथ्वीक पेलपाक जावचो ना आनी एकंदर मनशाच्या जिविताचेर कितें परिणाम जातलो, हें तरणाट्यांक सांगपाची गरज आसा.
देशांतले लोकसंख्येचेर नियंत्रण दवरूंक ना जाल्यार सगळ्यांक समस्यांक तोंड दिवचें पडटलें. आमी संवसारीक महाशक्त जावपाचें सपन पळयतात. तें साकार जावपाचें आसल्यार लोकसंख्येचे वाडीक आळाबंदा हाडपाक जाय, हें नवे पिळगेक पटोवन दिवचें पडटलें. वाडटे लोकसंख्येक लागून जावपी दुश्परिणाम आनी समस्यां विशीं विद्यार्थ्यांक जाणविकाय करपा खातीर शाळांनी आनी म्हाविद्यालयांनी परिसंवाद घडोवन हाडपाक जाय. लोकसंख्येचें शिक्षण अप्रत्यक्ष समाजीक शिक्षण म्हणून तरणाट्यांकच न्हय तर समाजाकय दिवपाची गरज आसा. लोकसंख्येचें शिक्षण ही काळाची गरज. लोकसंख्येची वाड आळाबंदा हाडपाक जाय, देशाक उदरगतीच्या मार्गाचेर व्हरपाक जाय आनी देश महाशक्ती जावपाक जाय जाल्यार लोकसंख्येच्या शिक्षणाक पर्याय ना.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
