भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज येजमान कोलकाता नायट रायडर्स आनी पंजाब किंग्स ह्या पंगडां मदीं हांगाच्या ईडन गार्डन्स मैदानाचेर जातली. गुणतकट्यांत पंजाब किंग्स णववे सुवातेर आसा. अंदूंच्या हंगामांत ताणें आठांतल्यो स मॅची व्हगडायल्यात. दुसरे वटेन कोलकाता नायट रायडर्सान सातांतल्यो पांच मॅची जिखल्यात. प्ले ऑफांत सुवात मेळोवपाची ताणें आपली स्थिती घटमूट दवरल्या. दोनूय पंगडां मदीं अजून मेरेन 32 मॅची जाल्यात. हातूंतल्यो 21 मॅची कोलकातान जाल्यार 11 मॅची पंजाबान जिखल्यात. ईडन गार्डन्स मैदानाचेर खेळिल्ल्या मॅचींचेर नदर मारली जाल्यार कोलकातान 12तल्यो णव मॅची जिखल्यात.
सुनील नरेन आनी फिल सॉल्ट हे जोडयेन अंदूंच्या हंगामांत कोलकाताक जबरदस्त सुरवात करून दिल्या. दोगांयनी ह्या हंगामांत सुमार 12 धांवड्यो प्रती ओव्हरीन केल्यात. तांकांच लागून कोलकातान पावर प्लेंत सुमार 11 धांवड्यो प्रती ओव्हरींनी धांवड्यो केल्यात. सॉल्टान फास्ट बॉलरां आड 176 आनी स्पिनरां आड 138चे स्ट्रायक रेटीन धांवड्यो केल्यात. दुसरे वटेन सुनील नरेनान फास्ट बॉलरां आड 160 आनी स्पिनरां आड 229 चे स्ट्रायक रेटीन धांवड्यो केल्यात.
आंद्रे रसेलान पंजाबा आड 200चे स्ट्रायक रेटीन 408 धांवड्यो केल्यात. आयपीएलांत खंयच्या पंगडा आड ताची ही सर्वोच्च स्ट्रायक रेट आसा. रसेलान ईडन गार्डन्सांत अजून मेरेन 79 सके मारल्यात. तशेंच ह्या मैदानाचेर सगल्यांत चड सके मारपी बॅट्समन आसा.
रसेलाक आडावप पंजाबा खातीर सामके म्हत्वाचें आसा. हें काम करपाक हर्षल पटेलाचो वापर करपाक शकता. हर्षला आड रसेलाची स्ट्रायक रेट फकत 134.6 इतकी आसा. तशेंच चार डावांनी दोन खेपे बाद केला. हर्षला खेरीत सॅम करनान ताका तीन खेपे बाद केला. पूण, ताचे आड रसेलाची स्ट्रायक रेट 221.4 इतकी जबरदस्त आसा.
दुसरे वटेन पंजाबाचो टॉप ऑर्डर सामकी अपेशी थारल्या. हाचें पंगडाक बसेंच लुकसाण जालां. अंदूंच्या हंगामांत पयल्या पांच बॅट्समनांनी आठ डावांनी सुमार 21चे सरासरीन आनी 125चे स्ट्रायक रेटीन 794 धांवड्यो केल्यात. दुसरे वटेन 6 ते 8वे मेरेनच्या बॅट्समनांनी तितक्याच डावांनी 487 धांवड्यो केल्यात. खाशेली गजाल म्हणल्यार ह्या बॅट्समांनी 35चे सरासरीन आनी 158चे स्ट्रायक रेटीन धांवड्यो केल्यात.
आशुतोष आनी शशांक ह्या नव्या चेऱ्यांचेर पंगड चड निंबून आसा. ह्या दोगांयनी 44.25चे सरासरीन आनी 177चे स्ट्रायक रेटीन 354 धांवड्यो केल्यात.
2022 सावन अजून मेरेन पंजाब हो स्पिनर्सां आड सामकी सावकाश बॅटींग करपी पंगड आसा. ह्या पंगडान स्पिनरां आड फकत 7.1 धांवड्यो प्रती ओव्हरीन केल्यात आनी ताची सरासरी लेगीत फकत 22 इतकी आसा. अंदूं लेगीत ताचे बॅट्समन स्पिनरां आड खेळटना सामके धडपडल्यात. पंजाबान अंदूं स्पिनरां आड 22.7चे सरासरीन आनी 126चे स्ट्रायक रेटीन 410 धांवड्यो केल्यात. अंदूंच्या हंगामांत स्पिनरां आड सगल्यांत चड म्हणल्यार 18 विकेटी व्हगडायल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
