बंगळुरूक अखेरेक जैत

भांगरभूंय | प्रतिनिधी

इंडीयन प्रिमीयर लिगेंत (आयपीएल) काल अनपेक्षीत निकाल पळोवपाक मेळ्ळो. धांवड्यांचो पावस घालपी सनरायझर्स हैदराबाद पंगडा मुखार जैत जोडपाक धडपडपी रॉयल चॅलेंजर्स बंगळुरूचो पंगड आशिल्लो. बंगळुरूचें कांयच शाणपण चलचें ना अशें जाणकारांक दिशिल्लें. पूण, घडलें उरफाटें. पयलीं बॅटींग करून 287 धांवड्यांचो पावस घालपी हैदराबादाक काल 207 धांवड्यांची मोख पेलूंक ना. ताका निर्धारीत 20 ओव्हरींनी 8 विकेटी व्हगडावन 171 धांवड्यो करप शक्य जाल्यो आनी ताका 35 धांवड्यांनी हार घेवची पडली.

रॉयल चॅलेंजर्स बंगळुरून स्लो खेळपट्टीचो योग्य रितीन वापर करून जैत जोडलें. प्ले ऑफाचे सर्तींत रावपाचे दिश्टीन बंगळुरू खातीर हें जैत म्हत्वाचें आसा.

207 धांवड्यांचो फाटलाव करतना हैदराबादाची स्थिती 6 बाद 86 अशी जाल्ली. विल जॅक्साचे पयलेच ओव्हरींत ट्रॅव्हिस हेड (1) बाद जालो. अभिषेक शर्मान 13 बॉलांनी तीन चवके आनी दोन सक्यांचे मजतीन 31 धांवड्यो करून डाव सांबाळपाचो यत्न केलो. यश दयालान ताका बाद केलो. इम्पॅक्ट खेळगडो स्वप्निल सिंगान ताचे पयलेच ओव्हरींत एडेन मार्करम (7) आनी हॅन्रिच क्लासेन (7) हांच्यो विकेटी घेतल्यो. ते उपरांत कर्ण शर्मान ताचे दोन ओव्हरींनी नितीश कुमार रेड्डी (13) आनी अब्दुल समद (10) हांकां बाद केले. मुखेली पॅट कमिन्सान बरी बॅटींग केली. ताणें 15 बॉलांनी एक चवको आनी तीन सक्यां सयत 31 धांवड्यो केल्यो. ताका कॅमेरून ग्रीनान बाद केलो.

भुवनेश्वर कुमाराक (13) लेगीत ग्रीनान बाद केलो. अशे तरेन हैदराबादाचे हारीची औपचारीकता बाकी आशिल्ली. शाहबाज अहमदान एक बाजू सांबाळून धरिल्ली. पूण, धांवड्यो आनी बॉल हातूंतलें अंतर चड वाडिल्लें आनी जोखीम घेवपा जाता इतक्यो विकेटी लेगीत हातांत नाशिल्ल्यो. शाहबाज 40 धांवड्यांचेर नाबाद उरलो. पूण, ताणें पंगडाक 8 बाद 171 धांवड्यां मेरेन व्हेलो. अशे तरेन बंगळुरू वट्ट एका म्हयन्या उपरांत जिखलो.

ते आदीं रजत पाटीदारान 19 बॉलांनी अर्द शेंकडो नोंदोवन रॉयल चॅलेंजर्स बंगळुरूक सांबाळ्ळो. विराट कोहली मैदानांत उबो आशिल्लो. पूण, ताची स्ट्रायक रेट ही पंगडा खातीर म्हारग थारली. ताणें 43 बॉलांनी 51 धांवड्यो केल्यो.

सनरायझर्स हैदराबादाच्या जयदेव उनाडकटान संथ गतीन मारो करून तीन म्हत्वाच्यो विकेटी घेतल्यो आनी आदींच आटिल्ल्या धांवड्यो आनीक आटयल्यो. कॅमेरून ग्रीन आनी दिनेश कार्तिक हांणी अखेरच्या ओव्हरींनी आक्रमक बॅटींग करून पंगडाचो स्कोर निर्धारीत 20 ओव्हरींनी 7 बाद 206 मेरेन पावयलो.

विराट कोहली आनी फाफ ड्युप्लेसीस (25) हांणी रॉयल चॅलेंजर्स बंगळुरूक पयले विकेटी खातीर 48 धांवड्यांची भागिदारी करून दिली.

कोहलीन आयपीएलांत ओपनर म्हणून 4 हजार धांवड्यो पुर्ण केल्यो. मयांक मार्कंडेन स्लो बॉल घालून विल जॅक्साक (6) बोल्ड केलो. ते उपरांत बॅटिंगेक आयिल्ल्या रजत पाटीदारान तिसरे विकेटी खातीर कोहली वांगडा 34 बॉलांनी 65 धांवड्यांची भागिदारी केली. रजतान 11 वे ओव्हरींत मयांकाक सेगीत चार सके मारले. पूण, ते उपरांत णव बॉलांनी एक धांवडी आयिल्ल्यान रजता वयलें चेपण वाडलें आनी ह्या चेपणाखाला सको मारपाच्या यत्नांत कॅच बाद जालो. ताणें 20 बॉलांनी दोन चवके आनी पांच सक्यांचे मजतीन 50 धांवड्यो केल्यो. कोहलीक अर्द शेंकडो पुर्ण करपाक 37 बॉल खेळचे पडले.

कोहली खेळपट्टीचेर उबो आशिल्लो खरो. पूण, तो धडपडटना दिसलो. जयदेवाच्या स्लो बॉलांनी ताका नाका पुरो केलें. हो ताचो कच्चो दुवो समजून घेवन ताणें ताका अखेरेक बाद केलो. जयदेवान हैदराबादाक व्हड विकेट मेळोवन दिली. कोहलीन 43 बॉलांनी चार चवके आनी एका सक्याचे मजतीन 118.6चे स्ट्रायक रेटीन 51 धांवड्यो करून तंबूंत परतलो.

कॅमरून ग्रीन आनी महिपाल लोम्रोर हांचेर जलद रितीन धांवड्यो करपाची जापसालदारकी आशिल्ली. पूण, हैदराबादान फिशालकायेन बॉलींग केली. जयदेवान तिसरी विकेटी घेतना महिपालाक (7) स्लो बॉलाचेर बाद केलो.

जयदेवान 30 धांवड्यो दिवन 3 विकेटी घेतल्यो. 2021 उपरांत पयले खेपे ताणें एका डावांत तीन विकेटी घेतल्यो. ग्रीनान 19वे ओव्हरींत पॅट कमिन्साची बॉलींग फोडून काडली. कमिन्सान पांचव्या बॉलाचेर दिनेश कार्तिकाक (11) बाद केलो. ग्रीनान 20 बॉलांनी पांच चवक्यां सयत नाबाद 37 धांवड्यो केल्यो. जाल्यार इम्पॅक्ट प्लेयर स्वप्निल सिंगान (12) पंगडाक दोनश्यां मेरेन मजल मारून दिवपाक मजत केली.