भांगरभूंय | प्रतिनिधी
नुस्त्याचे पदार्थ विकपी रेस्टॉरंण्ट येवजणेचोय आयज शुभारंंभ
पुराय राज्यांत नुस्तें विकपी 50 रिक्षा
मत्स्य आहार येवजणे खाला 25 रेस्टॉरंंण्टां
पणजी : राज्यांतले जनतेक सवाय दरांत आनी भलायकेक योग्य आशिल्लें नुस्तें उपलब्ध करपा खातीर आयज सावन मत्स्य वाहिनी येवजणे खाला ई रिक्षाचो शुभारंभ जाता. हे येवजणे खाला पुराय राज्यांत 50 ई रिक्षा सुरू जातल्यो. तशेंच मत्स्य आहार येवजणे खाला फीश फ्राय सारखे नुस्त्याचे पदार्थ मेळपी 25 रेस्टॉरंण्टां सुरू जातली. मत्स्य संंपदा येवजणे खाला मत्स्य वाहिनी आनी मत्स्य आहार येवजण्यांचो आयज शुभारंभ जाता.
आयज सुता पूनव. सुता पुनवे दिसा दर्याची पुजा करून नुस्तेमारी हंंगामाक सुरवात जाता. पणजेंत जावपी मुखेल कार्यावळींत ह्या दोनूय येवजण्यांचो शुभारंभ जातलो. मुख्यमंत्री डॉ. प्रमोद सावंत, नुस्तेमारी खात्याचे मंंत्री नीळकंंठ हळर्णकार, मंत्री बाबूश मोंसेरात हे सुवाळ्याक हाजीर रावतले.
मत्स्य संंपदा येवजणे खाला केंद्रा कडल्यान राज्याक निधी मेळटा. हे निधींतल्यान ह्यो दोनूय येवजण्यो सुरू जातल्यो, अशी म्हायती नुस्तेमारी खात्याच्यो संचालक डॉ. शमिला मोंतेरो हांणी दिली.
नुस्तें बाजारांत बरेच म्हारग आसा. तशेंच कांय वेळार बाजारांत पोवशेल्लें आनी रसायन लायिल्लें नुस्तें मेळटा. गोंयकारांंक सवाय दरांत नुस्तें मेळपा खातीर रिक्षा सुरू करपाची घोशणा सरकारान केल्ली. हे प्रमाण येवजणेचो आयज शुभारंभ जाता. आयज एकूच रिक्षा सुरू जातली. म्हयन्या भरात 10 रिक्षा सुरू जातल्यो. रिक्षांचो आंकडो वाडोवन डिसेंबर मेरेन 50 रिक्षा सुरू जातल्यो. पणजी, मडगांव सयत सगल्या शारांनी ह्यो रिक्षा भोंवतल्यो. नुस्त्याचे दर बदलत आसतात. बाजारांतल्या दरा परस रिक्षांतल्या नुस्त्याचे दर उणे आसतले. खासगी एजन्सी वतीन येवजणेची कार्यवाही जातली. सरकार फक्त इलेक्ट्रीक रिक्षा दितले. नुस्तें विकतें घेवपा सयत ते विकपाची पुराय जापसालदारकी रिक्षा चालकाची आसतली. खंयच्या शारांनी रिक्षा धाडपाच्यो, ताचो निर्णय जावपाचो आसा. आयज फक्त एकाच रिक्षेचे उक्तावण जातलें, अशी म्हायती नुस्तेमारी खात्याच्यो संचालक डॉ. शमिला मोंतेरो हांणी दिली.
मत्स्य आहार येवजणे खाला रेस्टॉरंण्टां सुरू करपी येवजणेचो शुभारंभ आयज जाता. आयज एकाच रेस्टॉरंण्टाचो शुभारंभ जातलो. येवजणे खाला 25 रेस्टॉरंण्टा सुरू करपाचो प्रस्ताव आसा. हे रेस्टॉरंण्टांनी फीश फ्राय, नुस्त्याची कडी, कालवण तशेंच हेर पदार्थ मेळटले. रेस्टॉरंण्टांनी नुस्त्याची विक्री लेगीत जातली. निविदा जारी करून कंत्राटदारां वतीन रेस्टॉरंण्टां चलयतले. जागो पळोवपा सयत रेस्टॉरंण्टां खासगी कंत्राटदार वा एजन्सींक चलोवची पडटली. मत्स्य संंपदा येवजणेच्या लावार्थ्यांक धनादेशाचे वांंटप कार्यावळींत जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
