भांगरभूंय | प्रतिनिधी
नवी दिल्ली: आयच्यान म्हळ्यार १ मे सावन कमर्शियल सिलिंडर ९९३ रुपयांनी म्हारग जाला. दिल्लींत तो ३०७१.५० रुपयांक मेळटा. खबरां एजन्सी एएनआय हांणी ही म्हायती दिल्या. तशेंच ‘ऑनलायन गेमींग रुल्स २०२६’ लागू जाल्यात.
मे म्हयन्यांत ध व्हडले बदल जाल्यात. ते खंयचे ते पळोवया.
१. वेपारी सिलिंडर ९९३ रुपयांनी म्हारग: तेल कंपनींनी वेपारी गॅस सिलिंडर रु. ९९३ मेरेन म्हारग केल्यात. दिल्लींत ताची किंमत रु. ३०७१.५० जाल्या. हाचे पयलीं २०७८.५० रुपयांनी ते मेळटाले.
परिणाम: कमर्शियल सिलिंडरांचें दर वाडिल्ल्यान रेस्टॉरंट धनयांचो खर्च वाडटलो. अशे परिस्थितींत च्या, नाश्तो आनी थाळी म्हारग जावपाक शकता. लग्नाचें जेवणूय म्हारग जावपाक शकता.
घरगुती सिलिंडरांच्या दरांत बदल जावंक ना.
२. ऑनलायन गेमींग खातीर नवे नेम आयच्यान लागू: ‘ऑनलायन गेमींग रुल्स २०२६’ आयज देशांत लागू जाल्यात. हाचे खाला ‘ऑनलायन गेमींग अथॉरिटी ऑफ इंडिया’ (ओजीएआय) स्थापन करतले. ही संस्था ऑनलायन खेळांचें नियंत्रण करतली, तांकां वेगवेगळ्या वर्गांत विभागतली आनी तांचेर नियंत्रण दवरतली.
तशेंच गेमींचो तीन श्रेणींत विभाग करतात. ऑनलाइन मनी गेम्स, ऑनलाइन सोशल गेम्स आनी ई-स्पोर्ट्स, मनी गेमींचेर बंदी आसा, मात हेर गेमिंग प्लॅटफॉर्म खातीर नोंदणी गरजेची आसतली. आतां विदेशी गेमींग कंपनींक लेगीत भारतीय कायद्यांतल्यान सुटका मेळची ना. जर एक कंपनी भारतांत सेवा दिता जाल्यार मागीर तिचें मुखेल कार्यालय खंयूय आसल्यार ताका भारतीय नेम पाळचे पडटले.
वापरप्यांचे सुरक्षे खातीर ऑनलायन खेळांत पिरायेची मर्यादा, पालकांचे नियंत्रण आनी वेळ मर्यादा सारकिल्लीं खाशेलपणां आसतलीं. गेमींग वेळार अर्थीक वेव्हाराचेरूय नियंत्रण दवरतले.
परिणाम: पिराय मर्यादा/पालक नियंत्रण सारकिल्या खर नेमांक लागून आनी खाशेलपणांक लागून, गेमींग वेसन आनी फटवणूक ह्यो केशी उण्यो जातल्यो अशी अपेक्षा आसा, जाका लागून वापरप्यां खातीर सुरक्षीत वातावरण तयार जातलें. तशेंच परकी कंपनींचेर नियंत्रण दवरपी सट्टेबाजी बंद जावपाची अपेक्षा आसा. हाका लागून सरकाराची येणावळ वाडटली आनी ई-स्पोर्ट्साक कायदेशीर खेळ म्हूण चड मान्यताय मेळटली.
३. डिझेल आनी विमान इंधनाची निर्यात सवाय जातली: बदल: केंद्र सरकारान डिझेल निर्यातीचेर आशिल्लो खाशेलो अतिरिक्त अबकारी कर उणो करून फुडल्या १५ दिसां खातीर दर लिटराक २३ रुपया केला. एप्रिलांत तो रु. ५५.५ आशिल्लो. तशेंच विमान इंधनाचेर (एटीएफ) खाशेलो अतिरिक्त अबकारी कर दर लिटराक रु. ३३ मेरेन उणो केला. एप्रिलांत रु.४२ आशिल्लो. ते भायर पेट्रोलियम मंत्रालयान इंधनाची व्याख्या बदल्ल्या आनी आतां एटीएफांत एटीएफांत सिंथेटीक इंधनाच्या मिश्रणाक परवानगी दिल्या.
परिणाम: शुल्क उणें जाल्ल्यान रिलायन्स आनी नायारा सारक्या भारतीय शुध्दीकरण कंपनींक परकी बाजारांत इंधन विकप सवाय जातलें, जाका लागून तांचो फायदो सुदारूं येता.
घरगुती वापरा खातीर पेट्रोल आनी डिझेलाचेर अबकारी करांत बदल जावंक ना, अशे तरेन सामान्य लोकां खातीर इंधनाचे दर स्थीर उरतले अशें अर्थ मंत्रालयान स्पश्ट केलां.
एटीएफांत कृत्रीम मिश्रणां खातीर परवानगी दिल्यार विमान क्षेत्रांत पर्यावरण-अनुकूल आनी पर्यायी इंधन वापरपाक प्रोत्साहन मेळटलें, जाका लागून उद्देगीक मानकांत स्पश्टताय येतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
